Projetu 104 Seidauk Hetan Lisensa Ambientál

0
256
Deputadu bankada Partidu Libertasaun Populár (PLP), Demétrio do Amaral. Foto Antonio Goncalves

DILI, (TATOLI) – Deputadu bankada Partidu Libertasaun Populár (PLP), Demétrio do Amaral hateten projetu hamutuk 104 maka seidauk hetan lisensa ambientál maibé pratikamente konstrusaun hahú ona.

“Ha’u iha lista ida hosi Ministériu ne’ebé tutela ba ambiente, Ministériu Agrikultura, ita iha projetu 104 maka hatama hela dokumentu hodi hetan lisensa ambientál, maibé ha’u avalia dokumentu ne’e katak projetu balun seidauk hetan lisensa ambientál maibé iha prátika konstrusaun hala’o ona”, Demétrio levanta kestaun ne’e iha plenária Parlamentu Nasionál, ohin.

Nia dehan, projetu balun kria rai rahun ka polusaun ne’ebé afeta tebes ba populasaun sira nia movimentu.

“Ita ko’alia kona-ba lisensa ambientál, ema balun hanoin dehan ita kria obstáklu ba dezenvolvimentu. Maibé, hakarak hateten loloos katak sé ita hakarak prosesu rigór ka lisensa ambientál, ne’e mós seguru ba investimentu no seguru ba biznis”, afirma.

Hatutan tan: “Nasaun barak, sira aplika bainhira emprezáriu sira kréditu iha banku, sei haree mós seguru iha aspeitu ba ambientál ninian. Ne’e tanba bainhira dezastre ambientál sira mosu, bele fó risku ba investimentu no kréditu ne’ebé emprezáriu ne’e hetan hodi halo prosesu negósiu”.

Tuir eis diretór ONG Haburas, lisensa ambientál ne’e parte hosi kondiaun atu asegura prosesu dezenvolvimentu rai laran.

Nia mós kestiona área protejidu, liu-liu Kristu Rei, Fatukama, ohin loron iha konstrusaun iha fatin ne’ebá (Estátua Kristu Rei nia kotuk), ameasa ba espasu públiku.

Demétrio haklaken dezenvolvimentu  ida kualidade presiza mós espasu aberta no espasu ambientál. Tanba ne’e, nia husu Ministériu relevante atu suspende atividade refere.

Jornalista: Xisto Freitas

Editora: Rita Almeida

HUSIK IDA HATÁN