Programa Ministériu Turizmu Identifika Poténsia Turizmu

0
371
Ministru Turizmu, Manuel Vong, asina termu pose iha seremónia tomada pose ba membru governu na´in lima. Imajen Mídia Palásiu PR.

DILI (TATOLI)—Ministru Turizmu, Manuel Vong promete katak nia sei halo serbisu maka´as hodi identifika poténsia turizmu iha Timor tanba iha Timor iha poténsia turizmu boot teb-tebes kompara ho nasaun seluk.

Eis Reitór Dili Institute of Tecnology (DIT) hato´o informasaun ne´e ba jornalista sira iha Palásiu Prezidente Nicolau Lobato, Bairru Pité, Dili, tersa lorokraik ohin, hafoin simu tomada pose hosi Prezidente Repúblika nu´udar Minisitru Turizmu iha Sétimu Governu Konstitusionál.

Poténsia turístiku ne´ebé atu dezenvolve, nia esplika, dahuluk, istória luta hasoru okupasaun Indonézia durante tinan 24 nia laran, tinan 500 hamutuk ho portugés sira no tinan 3 ho japoneze sira iha Funu Mundiál Daruak nian.

Daruak, rekursu turistiku kultura. Hahú hosi Oe-Cusse to´o iha Tutuala, hosi Ataúro to´o iha Suai, iha rekursu kulturál ne´ebé maka boot hodi transforma sai produtu hodi bele fa´an ba iha merkadu.

Datoluk, rekursu turístiku Relijioza Katólika ninian. Ida ne´e presiza tebes dezenvolve atu karetiriza timoroan ne´ebé maka sai fiar na´in ba iha Katólika nomós relijiaun sira seluk hanesan produtu turístiku ne´ebé prontu atu bele fa´an bainhira ita bele dezenvolve nia iha pakote viajen ka pakote turístiku ida di´ak.

Dahaat, rekursu ambiente natureza ne´ebé maka furak tebes iha tasi laran to´o iha Ramelau tutun, hosi tasi laran to´o iha Matebian tutun no hosi tasi mane to´o iha Kablaki nia tutun, hatudu katak ne´e rekursu ne´ebé bele dezenvolve sai hanesan produtu turístiku.

Vong informa katak ukun ida ne´e tenke ukun ida atu serbí hodi bele kontribui ba dezenvolvimentu nasaun no povu.

“Ha´u sente orgullu hanesan timoroan ida no hanesan sidadaun simplis ida bele kontribui buat oan ruma tuir ha´u nia kbiit, esperiénsia no matenek ne´ebé ha´u iha liuhusi bolsu estudu ne´ebé Estadu oferese iha área turizmu,” nia haklaken. (Jornalista: Xisto Freitas)

HUSIK IDA HATÁN