Programa Governu Refleta Problema Povu

0
112
Juventude Partidu Demokrátiku (PD) ho Frente Revolusionaria Timor-Leste Indepéndente (FRETILIN) afirma liuhosi konferénsia imprensa iha Largo Lecidere katak, programa governu da-hitu refleta duni povu nia problema. Foto Tatoli/Rafy Belo

DILI, (TATOLI) – Juventude Partidu Demokrátiku (PD) ho Frente Revolusionaria Timor-Leste Indepéndente (FRETILIN) afirma programa governu da-hitu refleta duni povu nia problema ne’ebé enfrenta iha moris loron-loron.

“Programa ne’e refleta duni problema ne’ebé povu enfrenta loron-loron hanesan problema estrada, bee moos, edukasaun, saúde, eletrisidade, agrikultura di’ak ba povu”, afirma portavóz juventude PD no FRETILIN, Abrão Nokosiku liuhusi konferénsia imprensa iha Largo Lecidere, kinta (19/10).

Nia hatutan, programa governu da-hitu refleta tebes programa ne’ebé mak partidu hotu-hotu ko’alia ka promote durante tempu kampaña.

Programa ne’e mós fó kontinuidade ba serbisu no obra sira ne’ebé governu anterior hahú tiha ona liu-liu mehi ne’ebé hakerek ona iha Planu Estratéjiku Dezenvolvimentu Nasionál (PEDN).

Programa ne’e mós hatudu kompromissu ba promosaun governasaun di’ak no funu hasoru korupsaun.

Programa ne’e komprometidu atu fó kbiit ba juventude sira liuhusi edukasaun no formasaun profesionál hodi fásil asesu ba merkadu serbisu eh kampu traballu.

Tanba ne’e, Abrão Nokosiku husu ba lider nasionál sira atu kontinua halibur malu tanba tinan lima oin mai hanesan tempu oportunu liu ba lider jerasaun tuan sira atu prepara kondisaun di’ak liutan ba jerasaun foun sira no tempu hanesan solusiona problema ne’ebé povu enfrenta ohin loron.

Deputadu hotu iha Parlamentu Nasionál (PN) atu iha boa vontade iha debate ne’ebé konstrutiva no tau aas liu interese povu nian duke interese ema ida-idak nian.

Juventude sira atu kontinua akompaña debate no diskusaun iha PN ho pasífiku, mantein estabilidade no paz nomós labele monu ba tentative dezestabilizasaun iha ita-nia rain.

Entretantu juventude PD no FRETILIN deklara reafirmasaun ne’e la’ós de’it hanesan forsa polítika partidária maibé mós hanesan sidadaun Timor-Leste liu-liu reprezenta maioria joven iha Timor-Leste.

Jornalista: Rafy Belo

Editora: Rita Almeida

HUSIK IDA HATÁN