Primeiru Ministru Prepara Proposta Nomeia Xanana Sai Prezidente Alta Autoridade

0
4028
Primeiru Ministru, Marí Alkatiri. Foto GPM

DILI, (TATOLI)—Primeiru Ministru (PM), Marí Alkatiri hateten nia sei hato’o proposta ba eis Xefe Governu, Kay-Rala Xanana Gusmão atu asume kargu Prezidente Alta Autoridade ba asuntu Negosiasaun Fronteira Timor-Leste nian nomós ba Dezenvolvimentu Tasi Mane.

“Ha’u seidauk haruka proposta maibé primeiru ha’u hakarak hatene feedback ka vontade hosi irmaun Xanana. Ohin, Ministru Agio Pereira sai ba hasoru irmaun Xanana Gusmão no lori ha’u nia mensajen ne’e hato’o ba irmaun Xanana”, informa Marí ba jornalista sira iha Palásiu Prezidente Nicolau Lobato, kinta ne’e.

Bainhira Kay-Rala Xanana Gusmão simu proposta refere, nia sei propoin ba Prezidente Repúblika atu fó tomada pose.

Marí hatutan iha ona lista membru governu foun atu aprezenta ba Xefe Estadu iha segunda ka tersa atu bele hetan tomada pose ba faze datoluk nian.

Aleinde ne’e, Xefe Ezekutivu ne’e afirma, Governu hato’o ona proposta atu estende tan mandatu Majór Jenerál FALINTIL-Forsa Defeza Timor-Leaste (F-FDTL), Lere Anan Timur ba tinan ida.

“Governu hato’o ona proposta no Konsellu Supeior Defeza no Seguransa apoiu ona proposta refere. Tan ne’e, Prezidénsia Repúblika sei halo Dekretu Prezidensiál hodi nomeia no fó posé ba Majór Jenerál Lere Anan Timur”, hatutan.

Jornalista: Xisto Freitas

Editora: Rita Almeida

HUSIK IDA HATÁN