Primeiru Ministru Kontente ho Debate Horisehik Duke Ohin

0
519
Primeiru Ministru, Marí Alkatiri ho Ministru Estadu Konselleru Seguransa Nasionál, José Ramos Horta iha debate programa ne'ebé aprejenta ba Parlamentu Nasionál. Foto Tatoli/António Goncalves

DILI, (TATOLI) – Primeiru-Ministru (PM), Marí Alkatiri iha debate loron daruak programa Governu Konstitusionál Dahituk nian ladún kontente tanba deputadu barak mak retira husi sira-nia intervensaun.

“Ba intervensaun hotu-hotu, horisehik no ohin, ha’u kontente liu horisehik duké ohin, tanba ohin ne’e retira, retira, ha’u ladún kontente ida. Ha’u prefere ita kontinua ko’alia”, PM hatete iha Parlamentu ohin bainhira hatán ba intevensaun husi deputadu balun.

Tanba ne’e PM dehan sei iha loron rua ka tolu nune’e partisipa hotu hodi esklarese ba malu. Governu sei hein nafatin pareser ténika ne’ebé sei mai hanesan proposta no sei inklui iha programa Governu nian.

“Saida mak falta ami inklui, ne’e mak ami hakarak, labele tékniku sira de’it mak halo proposta, sé deputadu sira inkonsiténsia, inkoerénsia, inprudénsia buat sira ne’e hotu entaun ami falta loron rua ka tolu, ami agora inpasiénsia de’it tanba ami pasiénsia sai inpasiénsia tanba proposta sira la mai”, PM hatete ho hamansa bainhira hatán ba intervensaun husi deputadu sira.

Governu hein proposta sira mai para bele akomoda no sai programa ida. Biar Governu minoria mas programa maioria, ne’e mak ami hakarak”.

“Ha’u triste ohin tanba uluk ita funu, ita retira kuandu iha inimigu, agora inimigu laiha ita retira tanba saida? Ita iha sala ida ne’e laiha inimigu ka ita retirada ne’e retirada estratéjika ka tátika ka ha’u lahatene loos”.

Maski nune’e, PM fó obrigadu ba intervensaun hotu no tinan lima tan sei fó ba Governu ne’e para bele kumpri ho devér, obrigasaun no bele tau aas liu memória eroi ho mártir sira-nian.

Sobre rekoñese hanesan fundadór nasaun ida ne’e PM hatete tanba nu’udar fundadór mak sei nafatin tuur hamutuk ho fundadór sira seluk.

“Tanba  hanesan fundadór maka ha’u buka dalan para servisu hamutuk ho irmaun Xanana Gusmão. Tanba ami ne’e tenke hamutuk”.

Jornalista: Maria Auxiliadora

Editora: Rita Almeida

HUSIK IDA HATÁN