Prezidente Repúblika Husu Hamenus Diferensa ba Jéneru

0
97
Prezidente Repúblika, Francisco Guterres Lú Olo dadalia ho Ministru Estadu no Ministru Rekursu Minarai, Mariano Assanami Sabino hafoin tomada pose membru governu ba faze daruak iha Palásiu Prezidensiál Bairo Pite, ohin. Foto António Goncalves

DILI, (TATOLI) – Prezidente Repúblika (PR), Francisco Guterres Lú Olo hakarak Governu ida ne’e tenke iha liu feto sira nia prezensa no partisipasaun.
“Ha’u kompromete án serbisu ho Primeiru Ministru no membru Governu sira atu ajuda hamenus diferensa oportunidade entre mane no feto, liu-liu iha kna’ar sira ho responsabilidade ás liu iha departamentu oi-oin Estadu nian”, deklara Xefe Estadu liuhusi deskursu iha seremónia tomada pose estrutura membru Governu faze daruak nian ne’ebé hala’o iha Palásiu Prezidente Nicolau Lobato, Bairru Pité, tersa lorokraik ne’e.

Atu dezenvolve nasaun ne’e, tuir nia, presiza promove feto sira no feto sira nia partisipasaun tanba ida ne’e hanesan objetivu estratéjiku ida ba dezenvolvimentu  nasionál.

“Ida ne’e maka ha’u sei buka halo atu valoriza feto sira iha ita nia sosiedade, hamutuk ho Governu maibé tuir ha’u nia kompeténsia rasik nu’udar Xefe Estadu”, hatutan.

Iha estrutura Governu da-hituk, partisipasaun feto iha na’in haat maka hanesan Lourde Bessa nu’udar Vise Ministra Edukasaun, Florentinha Smith ba Ministra Solidariedade Sosiál, Laura Menezes Lopes ba Sekretária Estadu Igualdade Jéneru no Inkluzaun Sosial, no Adaljiza Albertina Xavier Reis Magno ba Vise Ministra Negósiu Estranjeiru no Kooperasaun.

Jornalista: Xisto Freitas

Editora: Rita Almeida

HUSIK IDA HATÁN