Prezidente Repúblika Fiar Deputadu Sira Hatudu Maturidade Polítika

0
148
Prezidente Repúblika, Francisco Guterres Lú Olo. Imajen Mídia Palásiu PR.

DILI, (TATOLI) – Prezidente Repúblika, Francisco Guterres Lú Olo fiar katak deputadu hotu-hotu sei hatudu maturidade polítika, sei  fó-án tomak atu hadi’a proposta programa hosi Governu Konstitusionál dahituk atu povu bele moris di’ak liu-tan ohin loron no aban bainrua.

“Sétimu Governu hato’o ona ba Parlamentu Nasionál proposta programa ne’ebé fó-sai oinsá  governu sei haburas ita-nia rain.  ita hotu sei rona deputadu sira haksesuk, hato’o sira-nia hanoin, rona, hadi’a no ikus mai  simu programa governu nian nu’udar programa ita hotu nian, nu’udar programa nasaun nian”, Xefe Estadu hato’o liuhusi ninia mensajen Estadu ba nasaun ne’ebé ajénsia TATOLI asesu hosi mídia Palásiu Prezidénsia Repúblika, lorokraik ne’e.

Lú Olo hateten Governu dahituk sei metin tanba partidu hotu-hotu tau ás prinsípiu, valór, ho kompromisu sira ne’ebé tanen estabilidade governativa no sentidu estadu.

“Nu’udar Prezidente Repúblika ha’u  sei buka halo diálogu nafatin ho partidu polítiku sira tantu sira ne’ebé túr iha Parlamentu nomós sira ne’ebé la hetan asentu iha Parlamentu, ho  organizasaun hotu-hotu, ho sosiedade sivíl tomak, tuir ha’u-nia kompromisu rasik”, haklaken Xefe Estadu.

Nia hatutan hotu-hotu hakarak atu rai ne’e la’o ba oin liuhusi ida-idak nia matenek, tan ne’e  sei la hasees  partidu ida, organizasaun ne’ebé de’it no ema ne’ebé de’it. “Atu serbí ita-nia povu, ita tenke rona malu, hatene halo diálogu, halo kompromisu tuir prinsípiu no valores, atu hetan dalan di’ak liu-tan, atu halo di’ak liu-tan”, afirma.

Iha biban ne’e, Prezidente Repúblika apela ba povu tomak, liu-liu ba joven sira atu túr hakmatek nafatin iha ámbitu ida ne’ebé deputadu sira tetu programa mai hosi governu, atu hadi’a povu nia moris.

Jornalista: Xisto Freitas

Editora: Rita Almeida

HUSIK IDA HATÁN