Prezidente Repúblika Estende Mandatu Superior F-FDTL

0
414
Enkontru entre Majór Jenerál Lere Anan Timur no Xefe Estadu Lú Olo.

DILI, (TATOLI) – Prezidente Repúblika, Francisco Guterres Lú Olo nomeia hikas Lere Anan Timur nu’udar Xefe Estadu Maior Jenerál F-FDTL, Brigadeiru Jenerál Filomeno Paixão nu’udar Vise Xefe Estadu Maior no Koronél Falur Rate Laek hanesan Xefe Estadu Maior F-FDTL.

Tuir informasaun ofisiál ne’ebé ajénsia TATOLI asesu hosi mídia Palásiu Prezidénsia Repúblika, lorokraik ne’e haktuir proposta nomeiasaun ba superior F-FDTL na’in tolu ne’e mai hosi Governu, hafoin rona Konsellu Superior Defeza no Seguransa.

Majór Jenerál Lere Anan Timur nomeiadu nu’udar Xefe Estadu Maior Jenerál F-FDTL, liuhusi dekretu Prezidente Repúblika númeru 65/2017, Brigadeiru-Jenerál Filomeno Paixão nu’udar Vise Xefe Estadu Maior liuhusi dekretu Prezidente Repúblika númeru 66/2017 no Koronél Falur Rate Laek, nu’udar Xefe Estadu Maior F-FDTL, liuhusi dekretu Prezidente Repúblika númeru 67/2017.

Majór Jenerál Lere Anan Timur, Brigadeiru Jenerál Filomeno Paixão no Koronél Falur Rate Laek sei kontinua nafatin sira nia kna’ar hahú hosi 6 Outubru tinan ida ne’e ho durasaun tinan ida.

Aleinde ne’e, liuhusi dekretu Prezidente Repúblika númeru 69/2017, Xefe Estadu mós nomeia José António do Rosário Soares hanesan Sekretáriu Konsellu Superior Defeza no Seguransa.

Jornalista: Xisto Freitas

Editora: Rita Almeida

HUSIK IDA HATÁN