PR Dezigna Ona Membru Konsellu Estadu

0
1271
Prezidente Repúblika, Francisco Guterres Lú Olo. Foto António Goncalves

DILI (TATOLI) –Prezidente Repúblika (PR), Francisco Guterres Lú Olo dezigna ona sidadaun timoroan hamutuk Nain lima atu integra iha Konsellu Estadu, Sira nain lima, kompostu husi feto Nain rua no mane Nain tolu. Entretantu desizaun ne’e Xefe Estadu hasai iha loron 17 Outubru, foin lalais ne’e.

Membru Nain lima ne’ebé hetan fiar hosi Prezidente Repúblika sei hala’o nia knar durante tinan lima.

Sira Nain lima ne’e mak hanesan; Faustino Godinho Goncalves (Dekretu PR N.73/2017), Laura Soares Abrantes  ( Dekretu PR N.74/2017), Maria Dadi Soares Magno  (Dekretu PR N.75/2017), Oscar Lima  (Dekretu PR  N.76/2017), Alcino de Araujo Baris (Dekretu PR N.77/2017).

Dekretu PR ba nomeasaun membru Konsellu Estadu hatuur iha Konstituisaun Repúblika Demokrátika Timor Leste Artigu 86, alínea N ne’ebé konjuga mós ho alínea E husi Artigu 2 husi Lei no 1/2005, 9 Setembru.

Konstituisaun RDTL, Artigu 90. (Konsellu-Estadu) 1. Konsellu-Estadu mak órgaun konsulta polítiku Prezidente-Repúblika, ne’ebé nia rasik prezide. 2. Halo parte Konsellu-Estadu mak : a) Ex-Prezidente-Repúblika sira-ne’ebé la’ós destituídu; b) Prezidente Parlamentu Nasionál nian; c) Primeiru-Ministru; d) Sidadaun lima ne’ebé Parlamentu Nasionál hili ho harmonia tuir prinsípiu reprezentasaun proporsionál, ba períodu tuir durasaun lejizlatura nian, ne’ebé la’ós membru hosi órgaun soberania nian;  e) Sidadaun lima ne’ebé Prezidente-Repúblika mak foti, ne’ebé la’ós membru hosi órgaun soberania nian, ba períodu ne’ebé hanesan ho durasaun tempu ukun Prezidente-Repúblika nian.

Artigu 91. (Kompeténsia, organizasaun no funsionamentu Konsellu-Estadu nian) 1. Konsellu-Estadu maka bele: a) Fó-sai kona-ba disolusaun Parlamentu Nasionál; b) Fó-sai kona-ba demisaun Governu nian; c) Fó-sai kona-ba deklarasaun funu no oinsá atu hala’o dame; d) Fó-sai kona-ba kazu seluk tan ne’ebé iha Lei-Inan no, iha jerál, hato’o konsellu ba Prezidente-Repúblika bainhira nia hala’o ninia knaar, no bainhira nia husu karik. e) Halo ninia Rejimentu internu.

(Jornalista: Julia Chatarina)

(Editór : Manuel Pinto)

HUSIK IDA HATÁN