“Povu Hakarak Moris Digna”

0
263
Primeiru Ministru, Marí Alkatiri bainhira halo diskursu iha serimonia tomada pose iha Palásiu Prezidensiál. Foto António Goncalves

DILI (TATOLI)—Primeiru-ministru, Mari Alkatiri bolu atensaun ba membru governu sira ne’ebé ohin simu pose katak, povu Timor-Leste husu sira-nia direitu, kualidade moris ne’ebé digna liu.

“Povu ezije kualidade moris traduzida ba satisfasaun, direitu ne’ebé rekoñese konstitusionalmente ba edukasaun, saúde, eletrisidade no bee moos ne’ebé di’ak liu, hahán ne’ebé regulár no kompletu, habitasaun kondigna no seluk tan,” Mari Alkatiri hateten iha nia intervensaun bainhira fó pose ba membru governu konstitusionál dahituk faze daruak iha Palásiu, Prezidensiál , Ai-tarak laran, Dili, ohin.

Atu responde povu nia hakarak, nu’udar xefe do governu hakarak husu, forsa tomak hodi hamutuk garante pás no estabilidade, kondisaun “sine qua non” ba susesu kualkér programa dezenvolvimentu.

Ho diagnóstiku mínimu ne’e, ita reafirma ona katak prosesu governasaun nasaun nian, prinsípiu ko responsabilizasaun iha aktu polítiku husi leitura polítika no nia ezekusaun tenke sai konstante ida, assume hanesan kultura estadu iha reforsu vida institusionál.

Medida estruturanté estadu nian sei toma depois diskusaun ampla “Nakloke” hodi buka konsensu hodi garante estabilidade estadu rasik nu’udar instituisaun públika boot liu  tanba titular ne’e mak ita-nia povu ho sira-nia mehi no esperansa.

Ita-nia ekonomia kontinua ezije ita vizaun ne’ebé integrada liu ba dezenvolvimentu, rasionalizasaun ne’ebé klara liu ba despeza, investimentu ne’ebé sériu no kualidade iha infraestrutura bázika, re-enkontru entre edukasaun no kultura, entre saúde no saneamentu, entre turizmu no istória, agrikultura no seguransa alimentár, entre komérsiu no indústria no mós seluk tan.

Ita tenke konsidera finansiamentu ba ita-nia ekonomia ho baze reseita husi fontes la renovável sira nu’udar kréditu ida ne’ebé ita-nia jerasaun sira simu husi natureza no jerasaun sira tuir mai.

Hanesan kréditu ne’ebé mak tenke troka ba tempu badak no tempu naruk. Troka ho modu no permite katak ekonomia ho forma ida saudavel no sustentável.

Alkatiri observa, povu kontinua sai vítima ba moris husi ekonomia subsisténsia no importasaun nó mós provoka asimetria entre zona urbana no zona rurál ne’ebé labele simu. Ita tenke buka dalan hodi sai husi marazmu (paralizadu-red) ida ne’e, mobiliza ita hotu nia kapasidade hodi hatán nesesidade sira ne’e, liuliu ba maubere no buibere sira hotu.

Ba ida ne’e, estadu iha ona polítika investimentu ida ba setór dezenvolvimentu sosiál no ekonómiku. Rezultadu husi investimentu boot ne’e la korresponde ho ita-nia povu sira-nia ezijénsia.

Ita iha situasaun sira ne’ebé ezije ho kuidadu iha abordajen, vizaun multifasetada ida ka multidixipinár intervensaun governativa.

Kestaun dezenvolvimentu rekursu umanu tenke haree nu’udar prioridade ida iha reforsu kapasidade administrasaun no jestaun públika sira. Governu da-V no da-VI hahú ona serbisu diagnóstiku ba ita-nia rekursu umanu Administrasaun Públika. Governu da-VII sei analiza rezultadu estudu sira ho baze hanesan, hodi atua iha sentidu ba hadi’a serbisu sira iha setór sira hotu-hotu.

“Ha’u hateten ona katak ha’u sei la halo diskursu pragmátiku. Ha’u promote halo iha aprezentasaun programa tinan lima nian husi governu ba Parlamentu Nasionál,” Alkatiri promete.

No fó agradesementu ba partidu polítiku, sosiedade, membru diplomátiku nó mós konvidadu sira iha serimónia tomada pose.

“Nu’udar Primeiru-Ministru, ha’u halo ona buat hotu hodi aplika inkluzaun no ha’u sei kontinua halo to’o termina formasaun governu ne’ebé mak ha’u xefia,” Alkatiri konklui.

(Jornalista: Rafy Belo)

(Editór : Manuel Pinto)

HUSIK IDA HATÁN