PN Hili Ona Antonio Freitas Substitui Olandina Cairo

0
614
Komisáriu Komisaun Funsaun Públiku eleitu, António Freitas . Foto Tatoli: Antonio Goncalves

DILI (TATOLI) – Parlamentu Nasionál (PN) liuhosi eleisaun, hili ona António Freitas nu’udar komisáriu foun Komisaun Funsaun Públiku (KFP) ho votu 35 afavór hodi substitui komisária Olandina Cairo (actual Embaixadora Malaysia).

Antonio Freitas nu’udar kandidatu ne’ebé aprezenta hosi partidu Opozisaun (CNRT, PLP, KHUNTO) enkuantu Partidu Fretilín ho Partidu Demokrátiku nia kandidata mak Maria Filomena Exposto Martins ne’ebé ikus mai lakon iha eleisaun tanba hetan de’it votu 29 husi deputadus 64 prezente iha plenáriu, Tersa, ohin.

António Freitas, atuál hanesan dosente kontratadu iha Universidade Nasionál Timor-Lorosa’e (UNTL), ba Jornalista sira nia dehan, kargu ne’e hanesan onra boot no konfiansa tomak ida iha termu polítika ne’ebé nia sei lori.

“Prosesu tomak preparasaun ba oin konserteza ita sei hare prosesu ne’ebé internalmente, liu-liu prosesu rejimentu iha funsaun públika ninian iha termu lei seluk relativamente ba pozisaun ne’e.”

Asume kargu komisáriu KFP todan tanba tenke foti desizaun forte bainhira halo investigasaun, suspensaun, espulsa no seluk tan ba funsionáriu públika sira ne’ebé indixiplina ka la prienxe rekizitu seluk iha lei.

Tanba ida ne’e, Nia, sei koopera hamutuk ho funsionáriu no komisáriu sira ne’ebé iha ona, liu-liu ho prezidente para bele hare prosesu ne’ebé pendente dezde vaga ne’e mamuk.

Biografia

António Freitas moris iha Baucau iha loron 10 Novembru 1977 nu’udar timoroan no kaben-nain. Lisensiatura iha área relasoens internasionais, Universidade Komputadór Indonézia (UNIKOM – Universitas komputer indonesia), Bandung hafoin kompleta estudu Majistradu iha asuntu seguransa iha Universidade Katólika Parahyangan, Bandung.

Nia mós iha edukasaun non-formal hanesan partisipa kursu konaba reforma setór seguransa durante fulan ida iha Munich, Alemanha ho sertifikadu, partisipa kursu Counter Terorism iha Universidade Parahyangan, Bandung, partisipa simulasaun diplomátika iha UNIKOM, partisipa treinamentu konaba lei marítima internasionál (UNCLOS – United Nations Convention on the Law of the Sea) iha Universidade Xanhai, Xina ho sertifikadu, no partisipa mós seguransa marítima iha Hawai ho sertifikadu.

Nune’e mós iha esperiénsia servisu hanesan tradutór ingles iha UNAMET iha estasaun postu Laga (1999), tradutór ingles iha UNTAET iha distritu Baucau durante tinan (2000), Deputy pristick and electoral officer ba eleisaun prezidensiál (2001), Xefe komisaun eleitoral iha estasaun postu Laga ba eleisaun konstituinte (2001), Servisu iha UNDP asume knar nu’udar asistente eleitorál (2002).

Iha tinan 2005 servisu asisténsia umanitária iha dezastre naturál iha Aceh, Servisu iha UNFPA nu’udar nasionál project officer durante tinan ida (2010), iha UNMIT, nu’udar asisténsia ba asuntu reforma setór seguransa (2011), nu’udar ekipa painél ba selesaun bolsu estudu ba Austrália no Nova Zelandia (2012 – 2014) no atuál hanesan dosente kontratadu iha UNTL, departamentu Relasoens Internasionais (2013 – to’o agora)

(Jornalista: Julia Chatarina)

(Editor : Manuel Pinto)

HUSIK IDA HATÁN