PN Aprova Mosaun Rejeisaun

0
1507
Deputadu Hosi Bankada Fretilín ho PD hit kartaun Mean.

DILI (TATOLI)–Parlamentu Nasionál (PN) liuhosi deputadu Nain 65, entre nain, 35 afavór ba mosaun rejeisaun no kontra, 30, absteinsaun, 0 nune’e mosaun rejeisaun pasa, no PN deside entrega hikas programa ba governu.

Prezidente Parlamentu Nasionál, Aniceto Guterres antes taka plenária la haluha fó agradese ba públiku.

“Obrigadu ba senor deputadu. Parlamentu Nasionál nu’udar órgaun reprezentasaun povu, kumpre ona nia knar hodi halo apresiasaun tuir artigu 109 konstituisaun, maski apresiasaun foka de’it ba lejitimidade governu nian, enkuantu iha órgaun seluk atu iha knaar atu apresia no tesi konstitusionalidade ga la’e governu,” Prezidente Parlamentu Nasionál, Aniceto Guterres fó sai iha plenaria, ohin.

Nu’udar Prezidente PN Aniceto deklara fó hikas programa governu ba sétimu governu no deklara taka plenária apresiasaun programa sétimu governu nian.

Agradese mós ba Primeiru Ministru, Mari Alkatiri  ho membru sétimu governu hodi halo susesu ba debate apresiasaun programa sétimu governu nian.

“Agradese mós ba jornalista no vizitante, korpu seguransa PNTL no seguransa sivíl sira. Obrigado wain, ita hakotu sesaun plenária ohin nian.”

Antes halo votasaun Primeiru Ministru Mari Alkatiri promete katak, hahú semana ida ne’e nia sei tun ba povu lori dokumentu programa governu hodi ba informa ba povu, hahú hosi Oekusi to’o Lautein.

“Lalika laran taridu, ha’u kontente tebes. Ohin ha’u fila kaman tebes. Kaman atu tun ba baze lori dokumentu hanesan halo referendum ba timor leste tomak, la iha ema ida bele bandu ha’u. ha’u lider partidáriu ha’u iha obrigasaun atu esplika ba povu saida mak akontese iha parlamentu ida ne’e,” Primeiru Ministru afirma.

Mari Alkatiri mós dehan, hahú ohin nia sei rai transporte hanesan karreta Primeiru Ministru nian no eskolta ne’ebé durante ne’e fó seguransa ba nia, maibé la signifika nia rezigna aan.

Mari Alkatiri sei ezerse funsaun nu’udar Primeiru Ministru tuir konstituisaun too fulan Janeiru nu’udar Primeiru Ministru governu jestaun.

“Ha’u sei la fila mai PN ne’e lori programa governu. Saida mak akontese daudaun viciado, tuir dalan los muito bem,” Primeiru Ministru Alkatiri konklui.

Mosaun rejeisaun ne’e aprezenta hosi bankada Opozisaun hanesan CNRT, PLP ho KHUNTO ne’ebé iha asentu parlamentu nasionál hamutuk deputadu nain 35

(Jornalista : Manuel Pinto)

HUSIK IDA HATÁN