PM Alkatiri Sei La Ba PN Iha Apresiasaun Programa Governu

0
1267

DILI (TATOLI)-Primeiru-ministru Mari Alkatiri anunsia katak, nu’udar xefe sétimu governu konstitusionál nia sei la ba Parlamentu Nasionál iha apresiasaun programa governu daruak nian, maibé sei delega kompeténsia ba Membru governu balun hodi reprezenta nian.

“Sei iha surpreza ruma. Hatene ona buat barak, sei iha surpreza. Ha’u la bá, mas ha’u sei delega ha’u-nia membru governu seluk,” Primeiru-Ministru Mari Alkatiri ba jornalista sira, iha Aeroportu Internasionál, Nicolau Lobato, Comoro-Dili, Tersa (24/10).

Maski Primeiru Ministru sei la defende programa iha Parlamentu Nasionál, maibé nu’udar xefe governu nia parte oras ne’e prepara ona dadus, informasaun hodi delega ba membru governu ida hodi aprezenta ba deputadu kuartu lejizlatura sira, iha Parlamentu Nasionál, ba tempu oin mai.

“Ha’u prepara hela, tuir deputadu sira balun hakarak dadus, ami sei fó dadus. Osan hira mak iha, osan hira mak la iha, ami sei fó dadus tomak,” Alkatiri dehan tuir.

 “Dadus, informasaun sira ne’e hodi hatán ezijénsia deputadu balun ne’ebé mak hakarak dadus, iha apresiasaun programa governu dahuluk nian.”

Entretantu auzénsia PM Mari Alkatiri iha diskusaun daruak programa governu iha Parlamentu nasionál, tanba, Nia sei ba Oe-cusse.

Nune’e mós aproveita tempu hodi hato’o planu governu da-hitu ba timoroan sira hotu. Sei fó hatene ba to’os na’in hotu-hotu, natar na’in hotu-hotu, agrikultór sira hotu atu hatene.

“Seluk dansa iha Parlamentu Nasionál laran, ami dansa iha li’ur,” Mari Alkatiri fó sai bainhira fila husi Oe-cusse.

(Jornalista: Rafy Belo)

(Editór : Manuel Pinto)

HUSIK IDA HATÁN