PM Alkatiri La Aprezenta Programa La’ós Problema

0
264
Deputadu, Francisco Branco

DILI (TATOLI)—Xefe Bankada Fretilín iha Parlamentu Nasionál (PN), Francisco Miranda Branco dehan, apresiasaun programa governu ba daruak nian iha PN la hetan prezensa hosi Primeiru Ministru Mari Alkatiri la iha implikasaun.

“Xefe Governu, Mari Alkatiri la mai aprezenta programa mós la iha implikasaun, maibé nia reprezentante mai mós hanesan nia mak mai aprezenta,” Francisco Branco informa ba jornalista sira iha Parlamentu Nasionál, horisehik.

Tuir Francisco Branco, kuandu Xefe Governu sente dispozisaun la di’ak bele indijita reprezentante ida hanesan nia hodi mai aprezenta programa ba da-ruak nian.

Indijitasaun ne’ebé mak Primeiru Ministru sei halo la kontra lei tanba ema ne’ebé Primeiru Ministru indijita nia, reprezenta Xefe Governu.

Iha parte seluk, konstituisaun RDTL, Artigu 108, alínea 2 hateten Primeiru-Ministru hato’o programa governu nian ne’ebé Konsellu-Ministru aprova tiha ona ba Parlamentu Nasionál atu apresia iha prazu la liu loron tolunulu, sura husi loron ne’ebé Governu hahú nia funsaun.

Entretantu Primeiru Ministru, Mari Alkatiri aprezenta ona programa governu ba dahuluk iha Parlamentu Nasionál, maibé ikus mai bankada opozisaun sira aprezenta mosaun rejeisaun ba governu nia programa, nune’e Prezidente Parlamentu Nasionál diside entrega hikas programa governu nian hodi halo reestruturasaun hafoin aprezenta hikas.

 (Jornalista : Zezito Silva).

(Editór : Manuel Pinto)

Notisia Relasiona :

PM Alkatiri Sei La Ba PN Iha Apresiasaun Programa Governu

HUSIK IDA HATÁN