PJR Informa Atividade Ministériu Públiku Ba PR

0
50
Prokuradór Jerál Repúblika (PJR), José Ximenes hala´o enkontru ho Prezidente Repúblika, Dr. Francisco Guterres Lú Olo. Imajen Mídia Palásiu PR.

DILI (TATOLI)—Prokuradór Jerál Repúblika (PJR), José Ximenes hala´o enkontru ho Prezidente Repúblika, Dr. Francisco Guterres Lú Olo hodi informa ba Prezidente Repúblika (PR) kona-ba kna´ar Ministériu Públiku iha Palásiu Prezidente Nicolau Lobato, Bairru Pité, Dili, kuarta ne´e.

Atividade sira ne´ebé PJR levanta ba PR maka hanesan partisipasaun iha enkontru anuál Asosiasaun Prokuradór ninian iha Beijing (Xina) no partisipasaun enkontru anuál ba dahaat kona-ba Asset Recover Inter Agency Asia Pasific iha Tokyo (Japaun), ne´ebé iha altura ne´ebá PJR aprezenta Sistema Nasionál Rekoperasaun Ativu iha Timor-Leste.

Informa mós ba Prezidente Repúbika kona-ba atividade ne´ebé foin lalais Prokuradoria Jerál Repúblika halo hanesan tomada pose ba inspetur na´in ida nomós prokuradór distritál na´in rua (Dili no Baucau ninian).

Aleinde ne´e, José Ximenes mós informa kestaun balun hanesan kazu aprensaun ba kombustível iha Maliana hamutuk 50 itál toneladas ne´ebé konsege fa´an tiha ona 14 prosesu ninian, purtantu iha 20 itál mill dólares ne´ebé konserva tiha ona hanesan osan.

“Uluk mina no kombustível sira ne´e rai de´it iha ne´ebá depois ne´e fa´an hotu ona. Karik aban bainrua konklui akuzasaun, pelumenus objetivu krime ne´e sai ona hanesan osan para aban bainrua karik tribunál kondena, osan hirak ne´e bele hela ba Estadu. Karik tribunál arkiva, osan sira ne´e fila fali ba ninia na´in,” José esklarese.

Nia hatutan, nia mós relata ba PR kona-ba ezekusaun pena ba arguidu kazu partisipasaun ekonomia, Domingos Caeiro (eis Sekretáriu Estadu Obras Públikas), iha ne´ebé iha 27 Setembru 2017 liu-ba  kumpri ona pena prizaun iha Gleno, Ermera.

(Jornalista: Xisto Freitas)

(Editór : Manuel Pinto)

HUSIK IDA HATÁN