PIB Iha 2016 Aumenta ba Porsentu 30

0
227
Ministru Planu no Finansa, Rui Augusto Gomes, bainhira partisipa diskusaun iha plenária Parlamentu Nasionál.

DILI, (TATOLI) – Ministru Planu no Finansa, Rui Augusto Gomes hatete, polítika fiskál tuir dadus ne’ebé Timor-Leste iha hatudu defisit fiskál hetok boot iha 2015 ho porsentu 17 husi produtu internu brutu (PIB) no 2016 aumenta ba porsentu 30.

“Ne’e signifika katak asuntu ida ne’e importante no sériu tebes atu Estadu tau matan”, hatete Rui iha intervensaun sobre programa Governu Konstitusionál Dahituk ne’ebé aprejenta hodi hetan apresiasaun iha Parlamentu Nasionál, ohin.

Rui hatutan programa Governu Konstitusionál Dahituk reprezenta evolusaun nia kontinuidade nomós konsisténsia iha polítika no atu mantein konsisténsia polítika maka Komisaun Reforma Fiskál (KRF) daudaun halo serbisu no sei kontinua.

“Tanba saida mak Reforma Fiskál halo nia serbisu? Nia halo serbisu atu alkansa termu ida ita bolu sustentabilidade fiskál no sustentabilidade fiskál ne’e mai husi buat balun. Primeiru, oinsá mak atu estimula ekonomia naun petrolífera para reseita naun petrolífera sira ne’e aumenta, segundu mak kombate fraude fiskál, no terseiru melloria ba jestaun rekursu finanseira”.

Alinde ezersísiu sira ne’e, iha mós ezersísiu ne’ebé importante. “Ita sei diskute hamutuk mak rasionalizasaun rekursu finanseiru, signifika presiza iha alokasaun ne’ebé prudente ba rekursu sira ne’ebé eskazu”.

Ministru hato’o ida ne’e hodi hatán ba deputadu husi bankada Partidu Libertasaun Populár (PLP), Mericio Akara ne’ebé hatete Timor-Leste nia sustentabilidade Estadu depende maka’as ba fundu minarai maibé rekoñese katak fundu ne’e tuir gráfika tun ba daudaun.

“Governu nia programa agora ne’e mesak di’ak, maibé ne’e bele implementa ka la’e sé ita ko’alia kona-ba polítika fiskál, ita-nia rendimentu, ita-nia orsamentu, bele ka la’e programa hirak ne’e bele implementa”.

Tuir observasaun PLP nian katak iha dokumentu orijinál ladún mensiona kona-ba polítka fiskál tanba sustentabilidade Estadu depende ba sustentabilidade fiskál liuliu setór petrolíferu bainhira laiha fonte ida maka’as no adekuadu atu sustenta programa Governu oinsá? Tanba PLP lanota iha dokumentu orijinál nian liuliu sobre oinsá halo polítika fiskál no reforma fiskál.

“Signifika Governu ladún iha klareza kona-ba rendimentu, kona-ba risku ne’ebé ita sei enfrenta bainhira fundu minarai hotu, rezerva tun ba beibeik, ita ko’alia mós kona-ba rezerva mina no gás, rezerva naun petrolíferu ne’ebé mak iha tempu naruk sei troka rezerva ne’ebé agora ita iha. Iha kontestu ida ne’e  Governu falla atu aprezenta  polítika ida di’ak para ita bele konvensidu atu aprova programa ida ne’e”.

Jornalista: Maria Auxiliadora

Editora: Rita Almeida

HUSIK IDA HATÁN