Partisipasaun Feto Importante Hodi Foti Desizaun

0
211
Foto espesiál

DILI, (TATOLI) – Sekretária Estadu Igualdade Jéneru no Inkluzaun Sosiál (SEIJIS) liuhosi Diretór Jerál, Armando da Costa, hateten governu hakarak fó hanoin hikas ba povu, hahú hosi nivél baze to’o nasionál kona-ba feto nia partisipasaun hodi foti desizaun ba dezenvolvimentu nasaun nian.

“Partisipasaun feto nia desizaun ba dezenvolvimentu importante hanesan realizasaun luta ba ukun rasik-án, feto nu’udar parseiru mane bele halo servisu iha natar, sai karpintária, sai profesora, sai forsa defeza, sai líder iha aldeia eh suku to’o nivél nasionál”, dehan Diretór Jerál SEIJIS, Armando da Costa liuhosi konferénsia imprensa relasiona ho loron feto nasionál ne’ebé sei monu iha 3 novembru, kuarta (31/10).

Tanba ne’e, Governu liuhosi SEIJIS sei komemora loron nasionál feto iha suku Maumeta, postu administrativu Remexio no munisípiu Aileu ho tema valoriza feto sira nia luta hodi kontribui ba dezenvolvimentu nasionál.

Objetivu hosi komemorasaun ne’e promove feto sira nia luta hodi hetan sira nia direitu tuir dalan justisa, igualdade, liberdade no lia loos ba moris di’ak, hametin no kria relasaun ne’ebé di’ak entre feto sira tantu hosi nasionál, munisípiu no área rural.

Hametin relasaun entre SEIJIS ho komunidade hodi promove igualdade jéneru no hakbi’it feto, realiza sosializasaun informasaun hosi nasionál ba komunidade iha área rural atu bele hatene kona-ba loron nasionál feto Timor-Leste.

Hatutan no haforsa feto sira nia lian iha setór polítika hosi nasionál, munisípiu to’o área remota no enkoraza feto sira atu bele hatene sira nia papél iha sosiedade hanesan iha instituisaun governu inklui instituisaun sosiedade sivíl ne’ebé eziste no enkoraza sira atu hola parte ativu iha prosesu dezenvolvimentu nasaun.

Atividade hosi selebrasaun loron feto sei hala’o iha 9 novembru tinan ne’e, programa hirak mak halo promosaun no sosializasaun loron nasionál feto liuhosi mídia sosiál durante fulan outubru, funsionáriu sira SEIJIS sei fahe aifunan ba komunidade sira iha loron feto, fahe parsel ba inan sira ne’ebé partu iha óspital nasionál guidu valadares no iha Gleno Ermera.

Hala’o mós atividade talkshow iha RTTL kona-ba feto nia partisipasaun no involvimentu iha tempu funu to’o ukun rasik-an, misa ba loron feto nasionál no kari aifunan iha saudozu feto luta nain sira nia rate ne’ebé sei realiza iha komemorasaun 9 novembru.

Entretantu, loron nasionál feto atu fó valór no louvór ba feto sira tanba sira fó kontribuisaun maka’as ba luta libertasaun nasionál hahú hosi 1975 to’o 1999.

Jornalista: Zezito Silva

Editora: Rita Almeida

HUSIK IDA HATÁN