Oscar Lima Simu Kna’ar Hanesan Membru KE

0
345
Oscar Lima hasoru Prezidente Repúblika, Francisco Guterres Lú Olo, ohin iha Palásiu Prezidente Nicolau Lobato Bairo Pite. Foto dokumentasaun mídia PR

DILI, (TATOLI) – Prezidente Kámara Komersiu Indústria Timor Leste (CCI-TL sigla portugés) )Oscar Lima, hateten prontu  simu kna’ar hanesan Membru Konsellu Estadu ne’ebé nomeia hosi Prezidente Repúblika, Francisco Guterres Lú Olo.

“Ha’u hetan priviléjiu hosi Prezidente Repúblika para hola parte iha Konsellu Estaduʺ, dehan Oscar Lima ba jornalista sira hafoin hasoru malu ho Xefe Estadu iha Palásiu Presidensiál Bairo Pite, ohin.

Enkontru ne’e, Lú Olo ninia disponibilidade hodi asume kargu hamutuk ho membru nain haat seluk. “Ha’u kompromete sei halo buat ne’ebé ha’u bele halo no hanesan Timoroan saida maka ha’u bele fó ida di’akʺ, hatutan.

Tuir konstituisaun RDTL artigu 90, (Konsellu-Estadu) alinea 1) Konsellu-Estadu mak órgaun konsulta polítiku Prezidente-Repúblika, ne’ebé nia rasik prezide. 2) Halo parte Konsellu-Estadu mak: a) Eis Prezidente-Repúblika sira-ne’ebé la’ós destituídu; b) Prezidente Parlamentu Nasionál nian; c) Primeiru-Ministru; d) Sidadaun lima ne’ebé Parlamentu Nasionál hili ho armonia tuir prinsípiu reprezentasaun proporsionál, ba períodu tuir durasaun lejizlatura nian, ne’ebé la’ós membru hosi órgaun soberania nian; e) Sidadaun lima ne’ebé Prezidente-Repúblika mak foti, ne’ebé la’ós membru hosi órgaun soberania nian, ba períodu ne’ebé hanesan ho durasaun tempu ukun Prezidente-Repúblika nian.

Entretantu artigu 91 (Kompeténsia, organizasaun no funsionamentu Konsellu-Estadu nian)

Alinea 1) Konsellu-Estadu maka bele: a) Fó-sai kona-ba disolusaun Parlamentu Nasionál; b) Fó-sai kona-ba demisaun Governu nian; c) Fó-sai kona-ba deklarasaun funu no oinsá atu hala’o dame; d) Fó-sai kona-ba kazu seluk tan ne’ebé iha Lei-Inan no, iha jerál, hato’o konsellu ba Prezidente-Repúblika  wainhira nia hala’o ninia knaar, no wainhira nia husu  karik. e) Halo ninia Rejimentu internu; 2. Reuniaun Konsellu-Estadu nian la’ós públiku.

  1. Lei mak define Konsellu-Estadu nia organizasaun no funsionamentu.

Jornalista: Agapito dos Santos

Editora: Rita Almeida

HUSIK IDA HATÁN