MUTL Hato’o Karta Petisaun Ba PN

0
121
Foto espesiál

DILI, (TATOLI) – Movimentu Univesitária Timor-Leste (MUTL) hato’o karta petisaun ida ba Parlamentu Nasionál (PN) konaba kansela no invalida desizaun hola kareta foun ba deputadu sira.

“Movimentu Universitária Timor-Leste hato’o karta petisaun ba Parlamentu Nasionál, hakarak kansela no invalida desizaun atu hola prado foun, Parlamentu Nasionál hanesan mahon ba lejislasaun hotu-hotu bainhira halo desizaun no kria lejislasaun tenke kumpri ba lejislasaun ida halo ona”, afirma Sekretária Meza, Lídia Norberta iha konferensia imprensa ne’ebé realiza iha uma fukun, kinta (5/10).

Nune’e nia esplika líder bankada sira fó apresiasaun ba karta husi MUTL tanba tuir artigu 48 hateten sidadaun hotu atu individuál ka koletivu iha direitu atu halo petisaun.

Hodi fó hanoin, desizaun ne’ebé foti ona ne’e difísil tebes maibé tenke hala’o ho rigor tanba bainhira Konsellu Administrasaun (KA) sira reuniaun no submete ba plenáriu, plenáriu rasik unanimidade katak desizaun ida foti husi órgaun (KA) hanesan órgaun reprezentativu PN no deputadu hotu tanba ne’e tenke mantein nafatin no kontinua desizaun III lejislatura ba IV lejislatura.

Nia haktuir tan, karta ne’e MUTL sira fó prazu loron tolu komesa husi data sira submete karta iha 3 outubru nune’e 4 outubru horseik loron tolu ona.

Deputada ne’e hatutan, ne’e hanesan direitu sidadaun hotu hanesan individu no kolektivu atu hato’o ninian aspirasaun desde aspirasaun ne’e tuir lei.

Nune’e nia husu bainhira MUTL hakarak halo manifestasaun karik tenke tuir prosedimentu legál no husi ba autoridade polisiál no seguransa sira atu bele intera ho asuntu ida ne’e.

“Ida ne’e mak liberdade espresaun dalan la taka, ne meius ida atu ita komunika ba malu no ita bele hetan solusaun ne’ebé di’ak”.

Hodi informa tan, Prezidente PN hakarak hasoru malu ho reprezentante MUTL para halo diálogu tanba iha faze negosisaun normalmente tenke buka uluk meius persuasiva.

“Entaun ita sempre halo nafatin meius persuasiva, tanba ne’e ha’u haree MUTL nia sira hakarak duni”, katak tan.

Konaba data bainhira atu hasoru malu, PN seidauk bele adianta tanba sei iha faze diskusaun entre Prezidente PN ho líder bankada sira no haree ba ajenda sira ne’ebé PN iha no ate agora iha ona kareta 20 husi deputadu sira la reeleitu  mai entrega ona iha PN. 

Jornalista: Julia Chatarina

Editora: Rita Almeida

HUSIK IDA HATÁN