MNEK “Briefing” Diplomata Sira

0
249
Ministru negósiu estranjeiru, Aurélio Cristovão Guterres. Foto Gabinete PR

DILI, (TATOLI)-Ministériu Negósiu Estranjeiru no Kooperasaun (MNEK) “briefing” situasaun polítika no seguransa Timor-Leste (TL) ba diplomata, konsuladu no embaixadór estranjeiru sira ne’ebé nia embaixada iha TL.

Ministru negósiu estranjeiru, Aurélio Cristovão Guterres informa katak MNEK iha dever hato’o ba país amigu sira ne’ebé sira-nia rezidénsia ka embaixada iha TL kona-ba situasaun atuál iha rai-laran.

“Liu-liu kona-ba evolusaun polítika iha rai-laran. Ida ne’e mak objetivu prinsipál atu briefing kona-ba situasaun sira iha ne’e,” haktuir ministru Aurélio Guterres perante profisionál komunikasaun sosiál sira, iha salaun MNEK, Praia dos Coqueiros, Díli, sesta (20/10).

Governante ne’e relata katak hafoin hato’o situasaun rai-laran ba embaixadór, diplomata no konsuladu sira, sira hatudu satisfasaun tanba Timor-Leste prontu kedas no garante seguransa iha rai-laran.

Ita dehan ne’e prosesu demokrátiku ida ne’ebé, rai hanesan Timor-Leste enfrenta, kestaun, diskusaun sira la’o iha Parlamentu Nasionál (PN) entre polítiku sira ne’e hanesan normál iha ambiente demokrátiku ida.

“Ne’ebé, buat hotu-hotu kalma, ita-nia seguransa garantidu. Ne’e hatudu ba sira, sira kontente ho situasaun sira hanesan ne’e,” informa eis-reitór Universidade Nasionál Timor Lorosa’e (UNTL) ne’e.

Nia reforsa katak garantia ne’ebé mak Timor-Leste halo hodi manan liutan konfiansa husi diplomata, embaixadór no konsuladu sira mak, tuir nia, ita hanesan timoroan buat ida ne’ebé rai barak aprende husi ita mak maske ita foin mak ukun aan no restaura indepedénsia durante tinan 15 maibé ita konsege tuur hamutuk ko’alia internalmente.

Liliu ita-nia lider sira buka tuur hamutuk atu buka solusaun ba ita-nia problema nomós konsege tuur ho rai seluk.

Purezemplu hanesan Indonézia, durante tinan 24 iha Timor-Leste, ita hetan problema iha pasadu maibé ita konsege rekonsilia entre Indonézia ho Timor-Leste.

Modelu ida ne’e mak agora dadauk ita lori ba iha nasaun barak no aplika iha rai seluk. Ne’e hanesan modalidade boot ida em termos de paz.

“Ha’u sente ba ita-nia rain, ne’e buat ida di’ak. Iha tensaun iha parlementu maibé ne’e normál iha ambiente demokrátiku,” nia subliña.

Tuir observasaun ajénsia Tatoli nota katak hafoin MNEK “briefing” situasaun TL ba diplomata, konsuladu no embaixadór estranjeiru sira, sira louva no apresia ho maturidade povu no estadu TL.

(Jornalista: Rafy Belo)

(Editór : Manuel Pinto)

HUSIK IDA HATÁN