DILI, (TATOLI) – Movimentu Estudante Universitáriu Juventude Timor-Leste (MEUJTIL) konsidera diskusaun no debate programa governu konstitusionál da-hitu husi membru Parlamentu Nasionál (PN) laduun tau interese nasionál.
Portavoz MEUJTIL, Sebastião da Costa liuhusi konferénsia imprensa iha kampus Universidade Dili (UNDIL), kinta (19/10) husu ba lider sira fó liman ba malu hodi inspira no fó korajen ba jerasaun foun ho espiritu ne’ebé nakonu ho patriotizmu no nasionalizmu hodi garante pás no estabilidade iha Nasaun.
Ezije ba PN tane aas Nasaun nia dignidade hodi asegura estabilidade. Ezije ba lider partidu polítiku sira hotu atu organiza no mobiliza kuadru polítiku superiór no inferiór hatudu sira-nia maturidade polítika ba povu.
Entretantu, MEUJTIL mós fó onra no sauda ba servidór estadu ne’ebé fó ona nia kontribuisaun ba prosesu konstrusaun estadu tomak ne’ebé inísiu hatuur hikas fila fali hanesan estadu direitu demokrátiku.
Jornalista: Rafy Belo
Editora: Rita Almeida
