Membru Governu Partisipa iha Pregrinasaun Nasionál

0
230
Ministru Saúde, Dr. Rui Maria de Araújo no Ministru Rekursu no Minerais, Mariano Assanami Sabino hulan Nain Feto ba to´o iha Kapela Nain Feto Aitara iha pregrinasaun nasionál ne´ebé hala´o iha Soibada. Imajen espesiál.

SOIBADA (TATOLI)—Membru Sétimu Governu Konstitusionál hamutuk ho Bispu Don Basílio do Nascimento, Don Norberto Amaral no Don Virgílio do Carmo hamutuk ho sarani sira hosi Dioseze Baucau, Dili no Maliana partisipa iha pregrinasaun nasionál ne´ebé hala´o iha Parókia Soibada, Postu Administrativu Soibada, Munisípiu Manatuto, durante loron tolu (13-15 outubru 2017).

Pregrinasaun ne´ebé organiza hosi dioseze tolu (Baucau, Dili no Maliana) ne´e hahú hosi Igreja Parókia Soibado to´o iha Kapela Nain Feto Aitara iha foho Aitara, ne´ebé iha pregrinasaun ne´e membru Governu sira troka malu hodi hulan Nain Feto to´o iha Kapela Nain Feto Aitara.

Bispu Dioseze Baucau, Don Basílio do Nascimento esplika katak partisipasaun membru Governu iha pregrinasaun ne´e la´ós ideia mai hosi Uma Kreda maibé membru Governu sira nia inisiativa rasik.

“Partisipasaun membru Governu tomak iha pregrinasaun la´ós ideia mai hosi Uma Kreda  maibé sira rasik maka to´o konkluzaun katak atu hahú governasaun ne´e presiza hatudu hahalok ida ka orasaun en-komun Governu nian atu bele husu Maromak nia tulun ba sira nia atividade hanesan Governu,” Don Basílio hato´o asuntu ne´e ba jornalista sira iha Parókia Soibada, Postu Administrativu Soibada, Munisípiu Manatuto, sábadu (14/10) kalan.

Tuir Bispu katak partisipasaun governante sira iha pregrinasaun ne´e la´ós hanesan membru Governu de´it, maibé liu-liu mai hanesan sarani.

“Hotu-hotu hatene katak Dr. Marí Alkatiri la pertense ba Katólika maibé Dr. Alkatiri rasik dehan biar nia la pertense ba iha Katólika maibé nia hakarak mai partisipa iha pregrinasaun ida ne´e hodi hamutuk ho ministru sira hodi hasa´e sira nia hahalok governasaun nian ne´e ba Maromak,” Amu Basílio haktuir.

Kona-ba sentidu hosi pregrinasaun nasionál ba tinan ida ne´e, Bispu haklaken, tinan ida ne´e Dioseze Baucau hanoin liu kona-ba eukaristia katak buat ne´ebé sai hanesan orientasaun ba Dioseze Baucau maka sé ita komunga kristu tenke komunga Kristu nia isin maibé buka sai hanesan Nia. Katak, sarani sira komuniaun ita lolo nanál simu óstia ne´e  maibé óstia ida ne´e nia signifikadu boot liu matéria ne´ebé ita simu iha komuniaun.

“Buat ne´ebé ita hakarak sarani sira atu kompriende sakramentu ida ne´e, oinsá lori sarani sira bele kompriende katak simu sakramentu isin no ran ne´e la´ós de´it ha´u ba maka ne´e ona, maibé simu sakramentu eukaristia ne´e konsekuénsia ba sarani ida nia vida. Ne´e duni, komunga Kristu sai hanesan Nia ne´e atu kompriende katak liuhusi sakramentu ida ne´e hahalok sararani lubuk ida ne´e atu hetan Nia naroman, hadomi, moris Kariedade, hadomi lia loos, justisa, haboot Maromak Nia Reinu, Uma Kreda, Moris iha família,” Amu Basílio esklarese.

Nia hatutan Santuario Aitara ne´e hamriik tinan atus ida resin ona maibé liu-liu durante funu ne´e populasaun Timor koko iha nia moris Nossa Señora nia ezisténsia, Nossa Señora nia tulun, Nossa Señora nia prezensa ba povu Timor iha tempu funu nian ne´e.

“Komu Uma Kreda liu-liu iha tempu ne´ebé defisil ba moris Timor nian, iha tinan 1989, hahú organiza pregrinasaun mai iha ne´e mezmu iha susar no terus laran, Uma Kreda Timor mai halibur, haraik án iha Nossa Senõra Aitara nia mahon no buat ne´ebé testemuñu sira hateten ne´e Nossa Señora hatudu sai Inan Timor nian no ema nia orasaun iha foho Aitara nia tutun, la´ós leet de´it maibé Nain Feto rona povu Timor nia harohan no nia halerik,” líder Igreja Katólika afirma. (Jornalista: Xisto Freitas)

HUSIK IDA HATÁN