Membru Governu Lima Haforsa Sétimu Governu

0
335
Membru Governu na´in lima ne´ebé simu pose hasai foto hamutuk ho Prezidente Repúblika no Primeiru Ministru. Imajen Mídia Palásiu PR.

DILI (TATOLI)—Membru governu hamutuk ema na´in lima simu tan ona tomada pose hosi Prezidente Repúblika, Dr. Francisco Guteres Lú Olo iha Palásiu Prezidente Nicolau Lobato, Bairru Pité, Dili, tersa lorokraik ohin, hodi haforsa sétimu Governu Konstitusionál.

Membru Governu na´in lima ne´e maka hanesan Maria Ângela Carrascalão ba Ministra Justisa, Sara Lobo Brites ba Vise Ministra Planu no Finansas, Adalgisa Magno ba Vise Ministra Negósiu Estranjeiru no Kooperasaun, Dr. Manuel Vong ba Ministru Turizmu no Dr. Rui Meneses da Costa ba Vise Ministru Turizmu.

Prezidente Lú Olo hateten área justisa maka riin importante ne´ebé tanen Estadu Direitu Demokrátiku. Bainhira ema la asesu ba justisa, nia dehan, sei labele ko´alia ko´alia kona-ba demokrasia no Estadu Direitu.

Tuir Xefe Estadu katak pasta justisa ne´e la´ós fásil maibé nia konfia no hetan katak Ministra Justisa sei haka´as án hodi atinji rezultadu ida di´ak.

“Ha´u mós saúda Embaixadora Adagisa Magno, ne´ebé simu pose nu´udar Vise Ministra Negósiu Estranjeiru no Kooperasaun. Diplomata ida ne´e iha esperiénsia no reprezenta hela Timor-Leste iha Singapura. Nia (Adalgisa) sei haforsa liu-tan ekipa Ministériu Negósiu Estranjeiru no sei hasa´e kuñesementu kona-ba ASEAN iha Konsellu Ministru, nune´e ita sei hatudu di´ak liu-tan katak organizasaun ne´e importante ba ita nia polítika esterna,” nia afirma.

Lú Olo hatutan setór Planu no Finansas iha dezafiu boot, maibé nia fiar katak Vise Ministra Sara Lobo ne´ebé simu pose ohin hatene oinsá hasoru dezafiu sira ne´e.

“Governu haforsa liu-tan iha área turizmu ho Dr. Manuel Vong, nu´udar Ministru Turizmu no Dr. Rui Meneses ba Vise Ministru. Turizmu ne´e prioridade estratéjika ida atu diversifika ita nia ekonomia no haforsa kontribuisaun setór emprezariál nian tanba sei hamosu liu-tan empregu ba ita nia ema no tanen liu-tan ita nia ekonomia,” nia esplika.

Lú Olo salienta kataka presiza sosializa no promove turizmu istóriku, rikusoin no ambiente moos floresta nian, halo ida ne´e ba mós tasi, meti-ulun no ahu-ruin.

“Ita nia istória ne´ebé riku tebes, hamosu interese turístiku espesiál bainhira ema sukat ita nia rain ho fatin turístiku sira seluk iha ita nia rejiaun. Espesialista internasionál dehan mós katak tanba ita nia ambiente rai no tasi moos, Timor-Leste bele dada liu turista sira duké rai sira seluk. Ita bele dehan katak ita nia ambiente moos ne´e fó liu vantájen kompetetiva ba Timor-Leste iha área turizmu,” Prezidente tenik. (Jornalista: Xisto Freitas)

HUSIK IDA HATÁN