Maria Ângela Prontu Simu Dezafiu iha Governu Frajíl

0
296
Ministra Justisa, Maria Ângela Carrascalão asina termu pose. Imajen Mídia Palásiu PR.

DILI (TATOLI)—Ministra Justisa, Maria Ângela Carrascalão hateten bainhira  nia hatán ba Primeiru Ministru, Dr. Marí Alkatiri nia konvite hodi simu pasta Ministra Justisa, nia la haree ba Governu ida ne´e frajíl ka dura to´o tinan lima.

“Nu´udar timoroan, ha´u iha obrigasaun simu konvite hodi serbí povu no Estadu Timor. Ha´u labele hatán de´it buat ne´ebé fásil, maibé hatán mós situasaun Governu frajíl. Ha´u prontu simu dezafiu,” Maria Ângela hato´o kestaun ne´e ba jornalista sira iha Palásiu Prezidente Nicolau Lobato, Bairru Pité, Dili, tersa lorokraik ohin, hafoin simu pose nu´udar Ministra Justisa.

Eis Dekana Fakuldade Direitu UNTL ne´e informa katak tempu agora la´ós tempu atu halimar maibé tempu atu serbí ba konstrusaun Estadu.

Nia esplika bainhira serbí ba konstrusaun Estadu Direitu Demokrátiku, buat ida ne´ebé importante liu maka haree justisa, Ordenamentu Jurídiku, funsionamentu tribunál no kredibilizasaun justisa.

“Ita labele ko´alia mangame bainhira ita la halo buat ida. Ha´u fó ha´u nia laran tomak ba Sétimu Governu Konstitusionál hodi serbi Estadu liuhusi área justisa,” Maria Ângela tenik.

Nia rekuñese katak la´ós fasíl harii justisa iha rai ida liu-liu rai ida hanesan Timor iha sistema jurídiku tempu portugés, Indonézia, UNTAET, to´o mai agora. Tanba ne´e, tuir nia, atu adapta situasaun hirak ne´e la´ós fásil.

“Ita foin iha tinan 15 Independénsia. Ne´e duni, ha´u ema ida ne´ebé otimista katak ita tenke harii edifísiu Justisa Jurídiku di´ak no tenke iha rekursu umanu di´ak. Ida ne´e maka ita tenke prepara nune´e bele lori justisa ba oin,” Ministra ne´e haklaken. (Jornalista: Xisto Freitas)

HUSIK IDA HATÁN