MAP Seidauk Foti Kontentór 19 Iha Alfándega

0
66
Foto Espesial

DILI, (TATOLI) – Ministériu Agrikultura no Peska (MAP) seidauk foti kontentór 19 ne’ebé Alfándega apreende (foti) tanba ladauk selu taxa importasaun.

Diretór Jerál Alfándega, José António Fátima Abílio hatete sobre detalle no prosesu atu foti kontentór ne’e husi parte Alfándega esplika hotu ona ba MAP tanba tenke separa kustu ba selu taxa importasaun ho kustu ba selu broka.

“Momentu sira halo CPV sira tau vendór ida de’it mas labele. Kuandu atu selu ba vendór rua ne’e tenke halo ketak-ketak, ida ba SDV (nu’udar broka) no ida ba Alfándega”, esplika José iha edifísiu Ministériu Finansa tuan, ohin.

Nia hatutan, esplika hotu ona ba sira, agora filafali ba ministériu agrikultura nia hakarak atu rezolve situasaun ne’e ka la’e.

Nia laiha orsamentu karik, hatutan, tenke hatete buat ruma, sé la’e paradu de’it hanesan ne’e, parte alfándega labele fó sai, atu bele Estadu nia mós labele fó enkuantu rekizitu sira ne’e lakumpri, sé la’e viola fali regra, lori fali sansaun.

Tanba ne’e, Alfándega hein nafatin MAP bainhira mak hatudu ona transfer payment order (TPO)  bele hasai ona maibé kuandu seidauk simu entaun seidauk bele autoriza sai.

“Finansa Agrikultura nian tenke selu taxa, sé sira laselu tezouru la fó sai TPO mai signifika katak sira seidauk prosesa, kuandu sira prosesa no transfere ona ba tezouru no tezouru transfere no fó ona nia TPO mai ona entaun prontu ami ho baze ida TPO mai selu ona  bele liberta ona maibé durante sira seluk halo, ami labele halo buat ida”.

Entantu kontentór 19 ne’ebé uluk tau iha portu Dili muda sai ona ba estensaun portu Dili iha Tasi-Tolu. Kontentór ne’e prienxe ho ekipamentu agrikultura nian nu’udar doasaun husi nasaun Xina mai MAP.

Atu foti kontentór ne’e maka MAP tenke selu demurrage (taxa) ne’ebé hanesan lei ida APORTIL implementa bainhira sasán sira tama no liu tiha loron lima automátikamente aplika ona multa no husi parte Alfándega nian multa iha porsentu lima de’it.

“Agora APORTIL nian sei kona nafatin, bainhira nia selu tiha taxa ba Alfándega laiha problema ona no bele dada sai mas APORTIL dehan selu lai ami-nia taxa, prontu APORTIL ko’alia fali ho sira”.

Nune’e Diretór Jerál fó hanoin ba MAP atu selu lalais taxa para labele afeta beibeik ba demurrage tanba bainhira demurrage naruk nafatin maka APORTIL sei aplika taxa ne’ebé mak aas ba nafatin tuir loron ne’ebé iha.

“Atu lalais ka kleur hodi foti sai ne’e depende filafali ba na’in mak tenke iha desizaun hakarak foti”.

Sobre taxa husi APORTIL, José esplika katak kontentór ho 40 feet kada loron selu dólar 50 no 20 feet selu dólar 25. Enkuantu kontentór MAP nian ne’e haruka husi Xina mai no to’o iha Portu Dili iha setembru 2016 até agora seidauk foti.

Jornalista: Maria Auxiliadora

Editora: Rita Almeida

HUSIK IDA HATÁN