MAP Seidauk Delega Kompeténsia

0
74
Ministru Estadu no Ministru Agrikultura no Peska (MAP), Estanislau Aleixo da Silva. Foto/Egas Cristovão.

DILI, (TATOLI) – Ministru Estadu no Ministru Agrikultura no Peska (MAP), Estanislau Aleixo da Silva sei tuur hamutuk ho Vise-Ministru MAP, Deolindo Silva no Sekretáriu Estadu Agrikultura no Peska, Cipriano Esteves D. Ferreira, atu delega kompeténsia balun bainhira lei orgánika ministériu nian sai ona.

Ministru Estanislau hatete Vise-Ministru MAP nian, durante tinan barak nia laran serbisu iha agrikultura no koñese ministériu ho di’ak, nune’e husi nia parte sei haree liubá área agrikultura no ligasaun ho setór privadu ne’ebé mós sei servisu hamutuk ho ministru.

“Ha’u kontente tanba nia ema ida íntégru (onestu), ema ne’ebé serbisu dedikadu ba rai ida ne’e, ema ne’e partisipa iha rezisténsia, koñese ita-nia agrikultura di’ak hodi  nune’e dezenvolve agrikultura”, Estanislau dehan iha Parlamentu Nasionál, ohin.

Nune’e, Sekretáriu Estadu sei haree liuliu ba agro-negósiu, haree liubá problema ne’ebé liga ho produtór sira ho merkadu no oinsá mak atu hadi’a liután produsaun iha área kooperativa iha área  agrikultura nian.

“Mas ida ne’e la’ós haree de’it ba área kooperativa maibé área transversál, haree mós kooperativa peska no ligasaun ho merkadu no oinsá mak haree mós kona-ba mekanizmu ne’ebé tenke estabelese bainhira ita-nia produsaun karik iha valór ruma, hanesan kualidade produtu, haree kona-ba sertifikasaun para bele hetan fatin iha merkadu nixu nivel internasionál”.

Enkuantu ministru subliña ida ne’e la’ós halo kalan ba loron maibé ho prosesu ida depois delegasaun kompeténsia ne’ebé sei fó ba Vise-Ministru no Sekretáriu Estadu no sei serbisu ho ekipa maibé ekipa ne’e konta hamutuk ho diretór sira hodi diskute tanba programa ne’ebé mai husi Sétimu Governu mai husi sira.

“Sira (diretór) fó kontribuisaun, ha’u mai ajuda no ami tau hamutuk lori ba programa Sétimu Governu hanesan programa Sestu Governu nian ami halo diálogu ida di’ak tebes”.

Tanba ne’e, iha tinan lima oin mai, karik buat hotu la’o di’ak no laiha problema ho alterasaun klimátika ita bele aumenta produsaun para hamenus dependénsia ba ai-han husi rai-liur.

“Neste momentu ita importa mais porsentu 50 hare, ema balun husu tansá? Tanba tinan kotuk ita kuda de’it hare, halai natar serka de 11 mil ektare tanba udan-been. Tanba udan lamai, ami labele halo milagre, tantu hanesan mós Karau balun mate no ha’u fiar katak tinan lima oin mai sasán sira sei la’o di’ak”.

Aleinde haree ba produsaun hare, MAP sei haree mós ba produtu agríkola sira seluk hanesan, batar, koto, fore-keli. Kuda batar tanba presiza halo rasaun ba animál, ikan, nune’e batar hanesan elementu ida importante.

Jornalista: Maria Auxiliadora

Editora: Rita Almeida

HUSIK IDA HATÁN