La´o Hamutuk iha Situasaun Defisil, Marí Elojia Membru Governu

0
285
Primeiru Ministru, Dr. Marí Alkatiri hato´o nia deskursu iha seremõnia tomada pose membru Governu na´in lima iha Palásiu Prezidente Nicolau Lobato, ohin lorokraik. Imajen Mídia Palásiu PR.

DILI (TATOLI)—Primeiru Ministru, Dr. Marí Alkatiri elojia membru Governu sira tanba maske iha situasaun la favorável (defisíl) nia laran maibé membru Governu hirak ne´e deside la´o hamutuk ho nia iha Sétimu Governu Konstitusionál.

Marí hateten, bainhira Governu ida ne´e la to´o fin, governante sira ida-idak kontinua ho sira nia serbisu iha liur hanesan uluk no nia hatutan katak membru Governu sira la presiza sai membru Governu maka atu moris.

Xefe Governu informa nia la serbisu ho esperansa de´it maibé nia serbisu ho konviksaun no vontade.

“Ba ha´u ne´e esperansa nunka mate. Tanba ne´e maka ha´u serbisu ho konviksaun no serbisu ho vontade atu dudu dezenvolvimentu ba oin tanba povu hakarak dezenvolvimentu,” líder nasionál hato´o informasaun ne´e ba jornalista sira iha Palásiu Prezidente Nicolau Lobato, Bairru Pité, Dili, tersa lorokraik ohin, hafoin partisipa iha seremónia tomada pose ba membru Governu na´in lima.

Nia hatutan katak nia hakarak harii páz, estabilidade no hakarak lori dezenvolvimentu ba rai ida ne´e maibé hotu-hotu hakarak ka lae.

Kona-ba programa Governu ne´ebé aprezenta ona ba Parlamentu Nasionál, Marí informa, bainhira deputadu sira la aprova programa Governu, responsabalidade iha sira ne´ebé maka la aprova ne´e.

“Governu ne´e lejítimu. Tan ne´e, sira ne´ebé la aprova programa ne´e bele dehan sira nia argumentu inválidu,” nia afirma. (Jornalista: Xisto Freitas)

HUSIK IDA HATÁN