Labele Harii Governu atu Fahe De’it Kadeira

0
261
Prezidente Repúblika, Francisco Guterres Lú Olo bainhira halo diskursu iha serimonia tomada pose membru governu ba faze daruak iha Palásiu Prezidensiál Bairo Pite, ohin. Foto António Goncalves

DILI, (TATOLI) – Prezidente Repúblika, Francisco Guterres Lú Olo hateten Governu la’ós harii no labele harii atu fahe de’it kadeira maibé fahe kadeira tenke hatán ba povu nia nesesidade.
“Ha’u haree, ho laran ksolok no esperansa, katak ita fó valór ba ema nia esperiénsia. Ha’u uza liafuan esperansa tanba ha’u la haluha katak ita hakarak hasa’e kapasidade kualidade serbisu Estadu nian ba sidadaun sira”, Xefe Estadu Lú Olo hato’o lia hirak ne’e liuhusi ninia diskursu iha seremónia tomada pose ba estrutura Governu faze daruak nian ne’ebé hala’o iha Palásiu Prezidente Nicolau Lobato, Bairru Pité, Dili, tersa lorokraik tuku haat liu-ba.

Nia informa esperiénsia ema ida-idak nian no dedikasaun bele garante governasaun di’ak atu serbi sidadaun hotu-hotu.

Nu’udar Prezidente Repúblika, Lú Olo dehan, kompozisaun Sétimu Governu nian hanesan rezultadu kompromisu ida atu dudu ba oin prioridade nasionál sira.

Nia hatete, prioridade ida maka investe osan hosi Orsamentu Estadu atu hasa’e kualidade servisu públiku hanesan hadi’a servisu saúde, hadi’a eskola sira, kualidade edukasaun, rekunhese ka fó prémiu hodi haforsa profesór sira nia empenhamentu.

Prioridade seluk, Lú Olo hatutan, tenke hamenus kiak lalais, harii empregu ba joven sira, diversifika ekonomia liu-liu turizmu, hadi’a Infraestrutura, hala’o governasaun ida transparante no moos.

Jornalista: Xisto Freitas

Editora: Rita Almeida

HUSIK IDA HATÁN