KSDS Hahú  Diskute Seguransa Nasionál

0
127
Enkontru dahuluk membru Konsellu Superior Defeza no Seguransa iha Palásiu Prezidensiál, ohin.

DILI, (TATOLI) – Konsellu Superior Defeza no Seguransa, ohin realiza enkontru dahuluk hodi diskute konaba seguransa nasionál.

Xefe Kaza Sivil interina Prezidensia Repúblika, Ana Pessoa hateten, sorumutu ne’e hodi fó konsellu ba  Xefe Estadu konaba asuntu seguransa nasionál.

“Tuir lei, konsellu ne’e funsiona ho regulár atu prezidente bele akompaña saida maka akontese iha área defeza no seguransaʺ, dehan nia ba jornalista sira iha Palásiu Prezidensiál Bairo Pite. Maibé, nia la esplika kle’an tanba tuir lei, rezultadu enkontru ne’e konfidensiál.

Tuir informasaun ne’ebé rekolla, dekretu Prezidente Repúblika númeru 62/2017 loron 29 fulan-setembru nomeia Cornelio Gama (L7) no Cristina Alves da Silva sai membru Konsellu Superior ba Defeza no Seguransa.

Membru Konsellu seguransa kompostu husi ema na’in 13 hanesan Prezidente Repúblika Francisco Guterres Lú Olo, Primeiru Ministru, Marí Alkatiri, Ministru Negósiu Estranjeiru no Kooperasaun Aurélio Guterres, Ministru Defeza no Seguransa, José Agostinho Sequeira Somotxo, Ministru Justisa, reprezentante na’in-tolu husi Parlamentu Nasionál, Xefe Estadu Maior F-FDTL, Majór Jenerál Lere Anan Timur, Komandante Jerál PNTL, Júlio da Costa Hornai, Diretór Jerál Servisu Nasionál Intelejénsia (SNI), Manuel Serrano, Cornelio Gama (L7) no Cristina Alves da Silva.

Enkontru dahuluk ko’alia kona-ba kestaun defeza no seguransa no mandatu Xefia Militár.

Jornalista: Agapito dos Santos

Editora: Rita Almeida

HUSIK IDA HATÁN