Konstituisaun Loke Dalan Ba Referendu

0
746
Primeiru Ministru, Dr. Marí Alkatiri.

DILI (TATOLI)—Primeiru Ministru, Dr. Marí Alkatiri hateten Governu sei prepara Proposta Lei Referendu ba Parlamentu Nasionál atu deskuti no aprova tanba Konstituisaun loke dalan ba referendu bainhira presiza povu nia desizaun atu hadi´a buat balun ne´ebé la loos.

“Tenke iha lei ida maka atu regula referendu. Ha´u fiar katak deputadu sira iha sentidu estadu no responsabilidade atu apresia proposta lei ne´e tanba ida ne´e tuir dalan konstituisaun,” Marí hato´o kestaun ne´e ba jornalista sira iha Palásiu Preidente Nicolau Lobato, Bairru Pité, Dili, kinta ne´e, hafoin soru-mutu ho Xefe Estadu Francisco Guterres Lú Olo, hodi ko´alia kona-ba serbisu Governu.

Konstituisaun RDTL artigu 66 defini referendu hanesan tuir mai ne´e: (1) Rai-na´in sira ne’ebé resenseadu iha territóriu nasionál bele bolu atu fó sira nia votu  iha referendu kona-ba asuntu ne’ebé importante ba interesse nasaun nian. (2) Prezidente Repúblika maka sei konvoka referendu, tuir proposta um terço hosi deputadu sira no hetan aprovasaun hosi maioria dois terços membru Parlamentu Nasionál nian, ka tuir proposta ne’ebe hahú hosi Governu. (4) Lei maka sei define prosesu referendu nian.

Iha biban ne´e, Xefe Governu mós informa katak nia simu konvite ida hosi Organizasaun Ekonómika Finanseira hosi Austrália atu ba partisipa konferénsia ida iha Perth, Austrália, Novembru, atu ko´alia kona-ba polítika dezenvolvimentu Timor-Leste.

“Organizasaun ne´e organizasaun boot ida ho fundu ida ne´ebe boot, 65 biloens dóllares amerikanu, ne´ebé prontu atu ajuda rai sira ne´ebé maka besik Austrália oinsá atu halo investimentu. Loloos la oportunu atu ba maibé depois konvite ne´e mai insisti ha´u tenke ba duni no sei aranka iha 1 Novembru no fila hikas iha 6 Novembru,” Marí haktuir.

(Jornalista: Xisto Freitas)

(Editór : Manuel Pinto)

HUSIK IDA HATÁN