Komunidade Insatisfaz ho Transferénsia ESJ

1
686
Komisária Komisaun Funsaun Públika, Maria Domingas Alves. Foto espesiál

DILI, (TATOLI) – Rezultadu sondajen ne’ebé hala’o husi Komisaun Funsaun Públika (KFP) parseria ho organizaun lokál INSIGHT hatudu katak komunidade insatisfaz ho transferénsia Eskola Sekundária Jerál (ESJ) ba Ensinu Tékniku Vokasionál (ETV) tanba falta informasaun.

“Insatisfasaun boot liu mak komunidade sira, pursentu 59 la hatene informasaun kona-ba transferénsia Eskola Sekundária Jerál ba Ensinu Tékniku Vokasionál”, informa Komisária KFP, Maria Domingas Alves ba mídia sira iha salaun INFORDEPE Balide, sesta (6/10).

Nia hatutan, depois komunidade barak hela do’ok husi eskola públika, iha eskola privada. Entaun, komunidade sente katak sira esforsa-aan ba selu tanba besik duke sira ba eskola públika maibé dook. Laduun di’ak mós karteira no meza seidauk di’ak liu.

Ministériu Edukasaun iha área neen mak Komisaun Funsaun Públika (KFP) toma konta. Programa neen ne’e ho rezultadu sondajen husi respondente 1.200 hetan satisfasaun di’ak.

Ida mak kona-ba infrastrutura iha eskola, ida fali haree ba merenda eskolár, mezmu iha problema barak, ida fali mak kualidade ensinu, profesór sira hala’o duni sira-nia kna’ar. Persepsaun sente ne’e la’ós buat hotu bele reál.

“Entaun ida ne’e mak rezultadu husi persepsaun sondajen ba Ministériu Edukasaun ba programa ne’e. Diagnóstiku ne’ebé halo iha Funsaun Públika para haree liu forsa traballu”, subliña.

Nia objetivu ne’e hodi haree katak kuadru pesoál iha kada instituisaun, atu haree katak to’o ona ka seidauk, tenke rasionaliza di’ak liutan, re-estrutura di’ak liutan, haree mapa pesoál, avaliasaun dezempeñu, progresaun liliu ba rekursu umanu no kuadru pesoál kada instituisaun.

“Ida ne’e, mak rezultadu rua foin hato’o ba ministériu para bele sai hanesan instrumentu avaliasaun nian no halo planu ida ne’ebé di’ak liu bainhira sétimu governu konstitusionál hala’o nia serbisu”, akresenta.

Ministru Edukasaun no Kultura, Fernando Hanjam iha nia intervensaun hateten, kualidade prestasaun servisu iha funsaun públika ne’e importante tebes.

“Funsionáriu no ajente funsaun públika iha dever atu transmite konfiansa iha sesaun administrasaun públika hamutuk ho komunidade”, hateten ministru Fernando Hanjam iha nia intervensaun.

Iha mós dever ba lealdade, obidénsia, jéniu, sijílu, asuidade no pontualidade. Ministériu Edukasaun no Kultura iha nia tutela, maizmenus, métade husi funsionáriu públiku iha nasaun 450.000 alunu iha nível ensinu hotu-hotu.

“Reprezenta pursentu 40 populasaun”, akresenta membru governu sétimu konstitusionál ne’e. Nia reforsa tan, Ministériu Edukasaun no Kultura tenke asegura hodi presta kualidade. Responsabilidade hodi prepara ho adekuadu jerasaun sira ba futuru ita-nia nasaun nian.

Importante mak hafoin aprezentasaun rezultadu diagnóstiku, funsionáriu ministériu edukasaun no kultura hodi refleta kona-ba pontu forte ministériu nian ne’ebé presiza manten nafatin. “Pontu fraku sira ita presiza hadi’a hodi atinji meta edukasaun no kultura”, nia reforsa.

Governante ne’e sita investór filantrópiku no eskritór amerikanu, Bill Gates katak “Seus mais insatisfeito clientes, são a nossa maior forte de aprendizado”. Signifika kliente sira ne’ebé la satisfeitu liu mak ita-nia kbiit forte hodi aprende.

“Ita kaer didi’ak liafuan ida ne’e ka ita iha vizaun hodi iha konsiénsia ba ita-nia serbisu hodi hadi’a ita-nia dezempeñu”, nia konklui.

Entretantu Komisária lori KFP, reprezenta prezidente Faustino Cardoso, hato’o mós kumprimentu kortezia ba estrutura ME foun.

Jornalista: Rafy Belo

Editora: Rita Almeida

1 COMMENT

  1. DIAK LIU ESKOLA SIRA NE TRANFORMA HOTU BA escola teknica vocacional atu nune durante tinan tolu treinu alunos sira atu aprende teoria mos hanorin kedas sira oinsa halo buat ruma… hadia buat ruma ka konstroiu buat ruma atu nune wainhira sira sai sira iha ona skill ida hodi bele asegura sira nia moris…….

HUSIK IDA HATÁN