Kompetitór Na’in-10 Aprezenta Sira-Nia Planu Negósiu

0
68
Kompetitór na’in-10 ne’ebé mak tama iha prosesu KPNI. Foto/IADE.

DILI, (TATOLI) – Kompetisaun Planu Negósiu Inovativu (KPNI) dalimak nian ne’ebé realiza husi Institutu Apoiu ba Dezenvolvimentu Emprezariál (IADE) tama ona iha faze finál ho kompetitór hamutuk na’in-10 mak sei aprezenta sira-nia planu negósiu.

Diretór Ezekutivu IADE, Hernani Vitebro da Costa Soares hatete Timor-Leste presiza empreendedór barak, joven ho karater empreendedór hodi nune’e bele muda, kontribui, no hasa’e ekonomia Timór ninian.

Ba kompetitór na’in-10, Diretór Ezekutivu iha abertura programa KPNI aviza katak ba sira problema la’ós sobre manán no lakon maibé dezafiu boot liu mak oinsá atu hala’o sira-nia negósiu tanba iha oportunidade ne’e iha emprezáriu, banku no patrosinadór sira bele kontribui di’ak liután bainhira haree aprezentasaun no planu di’ak, sira bele apoiu, nune’e prepara án ho di’ak hodi halo aprezentasaun másimu atubele vizibiliza di’ak liután.

Hernani relata iha prosesu halo inskrisaun KPNI ba partisipante sira hahú iha marsu to’o abríl hetan kompetitór hamutuk 404.

“Tanba ne’e kompetisaun, ita tenke prosesa selesaun atubele mai to’o iha dez finais, husi 404 ba prosesu dahuluk ba buka ideia, ita hatún ba 274 kandidatu husi 404 inskrisaun ne’ebé tama iha IADE, iha sentru dezenvolvimentu iha munisípiu hotu”, Hernani hatete iha Timor-Plaza, ohin.

Nune’e husi 274 ne’e iha atividade lubuk ida ne’ebé halo ba iha prosesu eleiminasaun tuirmai no bainhira kandidatu sira remata ho idei,  kontinua ba haree sira-nia karater atu sai empreendedór, husi ne’ebá redús tan ba 200 resin.

“Depois de ideia, haree mós sira-nia karater, ikus mai ita hahú ho sira ne’ebé selesionadu hahú hakerek sira-nia planu, husi ne’ebá tun bá iha kandidatu 120 ne’ebé liu iha prosesu hakerek”.

Husi numeru ne’e halo aprezentasaun iha kada munisípiu no husi ne’ebá mak hetan kompetitór na’in-10 ne’ebé tama iha finál. “Ne’ebé hahú ohin, aban to’o bainrua sei hetan rezultadu finál ba nai’in-10  ne’e, no ida ne’ebé mak sai vensedór iha kompetisaun ida ne’e ba tinan 2017 nian”.

Buat ne’ebé IADE halo iha tinan ida ne’e mak foku ba planu no kompetitór sira sei aprezenta sira-nia planu katak sira tenke prepara didi’ak planu atu nune’e bele haree input saida mak sira bele fó.

Input ne’e bele osan, ekipamentu no seluk tan. Hanesan emprezáriu tenke prepara planu ho di’ak, hanesan agrikultór nia tenke prepara nia terrenu ho di’ak antes nia ba kuda modo, hili modo saida mak atu kuda, nune’e mós sira na’in-10 iha loron rua ne’e sei aprezenta ba ita planu saida mak sira iha, saida mak sira hakarak halo”.

IADE iha tinan ida ne’e aprezenta tema ba KPNI mak “Muda Ó-Nia Moris ho Negósiu Inovativu” atu bolu atensaun no fó oportunidade barak liu ba joven sira oinsá mak bele espresa sira-nia kreatividade, hanoin ne’ebé inovativu hodi bele muda sira-nia vida, ohin no ba futuru.

Jornalista: Maria Auxiliadora

Editora: Rita Almeida

HUSIK IDA HATÁN