Kompañia TL. Cement SA Sei Loke Formasaun

0
342
Diretór Kompañia TL Cement SA, James Ree kaer liman ho Primeiru-Ministru, Mari Alkatiri. Foto: TL Cement Sa.

DILI, (TATOLI) – Diretór ezekutivu TL Cement SA, Jamees Rhee informa, kompañia sei loke formasaun ba joven timoroan hodi bele serbisu iha kompañia ne’e ba tempu naruk.

“Oferese oportunidade tempu naruk nian, serbisu hamutuk ho Austrália, tan ne’e ami-nia treinamentu sira hotu sei bazea ba padraun Austrália nian nomós internasionál nian”, informa Diretór Jamees Rhee ba ajénsia Tatoli iha kompleksu Hotel The Ramelau, Ai-mutin, Dili, ohin.

Nia informa, formasaun ne’e iha parte rua, ida sei hala’o iha Timor-Leste nomós seluk sei hala’o iha Austrália, durante fulan 12 hodi bele kumprende kona-ba étika serbisu, abilidade bázika nomós lian inglés.

Bainhira sira gradua iha sentru treinamentu, hetan sertifikadu no imediatamente sira sei serbisu iha indústria mina no gáz Austrália nian. “Ami treina minimál serbisu rihun ida permanente iha inísiu projetu”, akresenta.

Jamees Rhee akresenta kompañia sei kria formasaun kontinua ho númeru ne’ebé boot ba foinsa’e timoroan sira. Feto no mane iha oportunidade hanesan atu treinu.

Treinamentu sei hahú uluk ba ema 250. “Ida ne’e mak ami-nia idea ne’ebé mak aprezenta ba Primeiru Ministru, Marí Alkatiri”, haktuir.

Nia dehan, governu Timor-Leste sempre apoiu sira-nia ideia no apoia maka’as no administrasaun seniór sira. Sira tenke liu pasu prosedurál, ambiente no konstrusaun nomós buat hotu agora iha progresu laran.

“Ami iha komprensaun klara katak governu iha ami-nia sorin no sempre suportivu”, nia garante.

Kona-ba tempu formasaun, nia esplika kompañia sei hahú uluk prepara kondisaun, presiza fulan rua to’o neen katak maizmenus jullu to’o setembru tinan oin bele mai iha sentru treinamentu. “Ida ne’e mak ami-nia idea”, realsa.

Entretantu, tuir komunikadu governu antes ne’e, fó sai  katak fábrika simentu ne’e sei harii besik zona luan ida ne’ebé nakonu ho ahu-ruin (kalkáriu) ho kualidade aas iha rejiaun Baukau nian, no sei halo produsaun ba simentu iha faze bázika fábrika nian (clínquer) ba  esportasaun no simentu ba abastesimentu konstrusaun sivíl iha Timor-Leste.

Komunidade lokál maka sei sai benefisiáriu dahuluk husi projetu ne’e, liuhusi konstrusaun unidade formasaun nian ida. Benefísiu sira ba tempu naruk sei aprezenta bainhira Governu hahú ona serbisu ho empreza ne’e no hodi garante kontratasaun traballadór sira iha munisípiu hotu-hotu Timor-Leste nian.

Projetu TL Cement ne’e abranje objetivu boot tolu Governu nian kona-ba reforma ekonómika sira: aumenta investimentu privadu, promove diversifikasaun ekonómika no promove empregu sustentável.

Iha serimónia  ne’e, asina ona mós sertifikadu investimentu nian ho L & S Unipessoal (otelaria), ho Palm Spring Hotel Lda. no ho Stamford Medical Lda.

Portavóz Governu Konstitusionál VI nian, Ministru Estadu Agio Pereira, hatudu nia laran-haksolok ba avansu husi projetu TL Cement nian no hateten katak “susesu projetu ne’e nian sei fó sinál pozitivu ba investidór estranjeiru sira seluk, hodi aumenta konfiansa katak Timor-Leste sai hanesan fatin ne’ebé di’ak hodi halo negósiu”.

Projetu ne’e rasik, sei uza mós ho enerjia renovável husi Alemaña hodi la kontribui efetivu ba poluisaun.

Informasaun relevante, bele asesu mós iha ne’e, https://web.facebook.com/1948152352080110/videos/2050455265183151/ no https://web.facebook.com/1948152352080110/videos/1963243987237613/ inklui www.tlcement.net.

Jornalista: Rafy Belo

Editora: Rita Almeida

HUSIK IDA HATÁN