Koima Kobrada Husi 2017 Hamutuk U$100.000

0
128
Foto/Google.

DILI, (TATOLI) – Xefe Divizaun Kontraordenasaun, Autoridade Inspesaun no Fiskalizasaun ba Atividade Ekonómika no Sanitária (AIFAESA), Ornella Peregrina Dias Fernandes, informa husi fevereiru to’o outubru 2017, AIFAESA notifika ona empreza 99 hodi selu koima ba kofre Estadu hamutuk U$100.000.

Aleinde ne’e kompañia 455 hetan auto notísia ba prosesu kontraordenasaun ne’ebé mai husi Autoridade Munisipál Baukau, Dili, Ermera, Munisípiu Kovalima, Manufahi, Bobonaru no Likisá.

“Husi 455 prosesu kontraordenasaun ne’e iha prosesu loron 15 nia laran, ami husu ba empreza na’in sira mai halo auto defeza liuhusi audisaun, sira sei mai prienxe deklarasaun hodi hato’o sira-nia defeza ho razaun ne’ebé iha no husi ne’e ami sei estuda prosesu no hato’o ba superiór hodi foti desizaun kona-ba sira-nia infrasaun”, Ornella hato’o iha Matadouru, ohin.

Hafoin hetan desizaun husi Koordenadór AIFAESA, maka sei notifika tan empreza sira ne’e iha prazu loron sanulu nia laran atu kumpri desizaun ne’ebé hasai ona.

“Karik loron sanulu nia laran sira kumpri maka sira sei mai foti resibu iha finansa hodi bá selu iha BNCTL. Husi instrusaun prosesu sira ne’e hotu, husi 10 dias ne’e ami hetan ona estabelesimentu hamutuk 99 mak kumpri ona desizaun finál selu koima, iha empreza ida mak hetan koima dólar 2000 tanba nia infrasaun maka’as uitoan, nune’e koima kobrada hamutuk dólar 100.000”.

Operadór ekonómika ne’ebé selu multa boot ne’e tanba hetan infrasaun ho produtu liu prazu 300 resin tanba tuir Dekretu Lei 23 hatete koima ne’ebé fó hahú husi U$1000 to’o 10.000, ne’ebé depende ba superiór atu foti desizaun.

“Iha prosesu 19 ne’ebé ami entrega ona ba Ministériu Públiku no tuir fali sira-nia prosesu iha ne’ebá mas ami seidauk iha informasaun ruma husi sira”.

Prosesu auto notísia kontraordenasaun ba empreza 455 ne’e tanba sira balun laiha lisensa komersiál, sasán liu prazu, fa’an sigarru eletróniku, atividade la tuir lisensa no balun laiha autorizasaun husi entidade kompetente.

Jornalista: Maria Auxiliadora

Editora: Rita Almeida

HUSIK IDA HATÁN