KM Ohin Halo Apresiasaun ba Programa VII Governu

0
205
Reuniaun Konsellu Ministru Primeiru Ministru. Foto Mídia PM

DILI (TATOLI)—Reuniaun konsellu Ministru sétimu governu konstitusionál, ohin, Kuarta (04/10) lidera hosi Primeiru Ministru, Mari Alkatiri, nia ajenda ida mak halo apresiasaun ba programa sétimu governu  nian.

Tuir Konstituisaun RDTL artigu 108 alínea 2, Primeiru-Ministru hato’o programa governu nian ne’ebé Konsellu-Ministru aprova tiha ona ba Parlamentu Nasionál atu apresia iha prazu la liu loron tolunulu, sura husi loron ne’ebé Governu hahú nia funsaun.

Primeiru Ministru, Mari Alkatiri antes ne’e dehan, programa Sétimu Governu Konstitusionál ba Orsamentu Rektifikativu prontu ona no ohin (Kuarta) sei halo aprovasaun iha Konsellu Ministru hodi haruka ba Parlamentu Nasionál hodi debate no aprova.

Programa ne’e bazeia ba Planu Estratéjiku Dezenvolvimentu Nasionál, ne´ebé sei implementa liuhusi gia implementasaun. Nune’e garantidu katak programa no Orsamentu Rektifikativu sei hetan aprovasaun iha Parlamentu Nasionál.

Primeiru-Ministru Mari Bin Amudi Alkatiri, afirma iha nia diskursu posse membru governu da-ruak, dehan. sétimu governu mai ho misaun boot ida atu hadi’a setór hotu-hotu inklui FALINTIL-Forsa Defeza Timor-Leste (F-FDTL) no Polísia Nasionál Timor Lorosa’e (PNTL).

PNTL ho F-FDTL governu sei atensaun espesiál liu iha área formasaun no meiu nesesáriu hotu atu dezempeñu sira-nia funsaun hodi garante soberania no pás.

Kontinua mós fó atensaun ba delimitasaun Fronteira permanente iha ita-nian territóriu ne’ebé inklui rai, tasi no anin.

VII Governu mós trasa nesesidade ba kontinuidade no polítika dezenvolvimentu sustentável adekuada ho planu no programa Objetivu Dezenvolvimentu Sustentável Nasaun Unida Nian.

Inklui atu aumenta partisipasaun hotu, interasaun ho forsa moris sosiedade nian, define forma kolaborasaun no apoiu mútua entre Estadu, igreja Katólika no konfisaun relijioza sira hotu, sempre sai hanesan baze inkontornavel  polítika VII Governu Konstitusionál ne’ebé iha subida onra atu prezide.

Entretantu Primeiru Ministru Anterior Rui Maria de Araújo subliña iha dokumentu retratu governu VI governu ne’ebé nia lidera katak, Governu Konstitusionál da-VI simu pose iha loron 16 fulan-Fevereiru tinan 2015 no, hatuur nia kompromisu ho onra no sentidu-Estadu, banati ba Konstituisaun Repúblika Demokrátika Timor Leste nian, fó ninia esforsu tomak hodi serbí ba interese Nasaun no ita-nia povu nian.

Governu Konstitusionál da-VI haka’as an, durante tinan rua ho balun, hodi servisu maka’as, ho rigór no perseveransa atu kaer-metin dame no seguransa ba ita-nia povu, hamosu kondisaun moris nian be di’ak liu, hodi harii infraestrutura bázika sira no atu tau matan ba ita-nia rekursu umanu nune’e sira bele mós habiit diversifikasaun ba ekonomia, hodi kontinua ita-nia prosesu dezenvolvimentu nasionál.

Governu kompromete an atu hadi’a sai di’ak liután no atu fó ba sidadaun hotu-hotu prestasaun servisu ida di’ak liu, ho kualidade ida di’ak liu no besik liután, no atu adota polítika hirak ne’ebé bele evita gasta osan Estadu nian arbiru, iha setór haat ne’ebé sai hanesan riin ba Programa Governu nian.

Iha setór sosiál, infraestrutura, ekonómiku no governasaun nian. Nune’e, ita konsege alkansa progresu hirak signifikativu iha área saúde ho lansamentu Pakote Abranjente kona-ba Kuidadu hirak Primáriu Saúde nian no Programa Saúde iha Família, hodi hadi’a sai di’ak liután servisu médiku emerjénsia nian sira, no iha reabilitasaun konstrusaun ba infraestrutura saúde nian.

Harii ona Eskola foun sira, ita forma ona profesór sira, ita fahe ona meza no kadeira, livru no materiál ensinu hirak seluk, ita implementa ona kurríkulu foun ida iha primeiru siklu Ensinu Báziku no ita finansia ona merenda eskolár, kondisaun hirak esensiál atu ita-nia labarik no klosan foin-sa’e sira bele hetan asesu ba edukasaun ida ho kualidade.

Polítika protesaun sosiál, liuhusi apoiu ba sidadaun hirak vulneravel liu, hodi la haluha ita-nia Kombatente Libertasaun Nasionál. Ita aprova ona mós Lei kona-ba Rejime Jerál Seguransa

Sosiál no Institutu Nasionál Seguransa Sosiál, pasu fundamentál ida tanba sustentabilidade Estadu sosiál nian ne’ebé ita hotu fiar.

Kontinua dezenvolve infraestrutura hirak bázika ne’ebé, aleinde poténsia kreximentu ba ita nia ekonomia, sai mós hanesan katalizadór tranzversál ba dezenvolvimentu área hirak seluk hanesan edukasaun, saúde no empregu.

Nune’e mós apoia ona, empreza hirak ki’ik no médiu no emprezáriu sira, kooperativa sira no mikro empreza sira iha área oin-oin, nune’e mós ita dudu ba oin atividade agríkola, pixikultura sira no pekuária, hodi promove dezenvolvimentu setór ida ne’e nian, ne’ebé importante tebes ba país.

(Ekipa Redasaun)

HUSIK IDA HATÁN