Kafé Movel Nu’udar Manan Nain Kompetisaun Planu Negósiu Innovativu

0
116
Kafé Movel. Foto/Facebook.

DILI (TATOLI)—Negósiu ne’ebé hanaran an “Kafé Movel”  sai nu’udar manan Nain ba kompetisaun Planu Negósiu Inovativu (KPNI) tinan 2017 ne’ebé partisipa hosi kompetidór hamutuk na’in-sanulu ho ideia no planu interesante ba negósiu.

Nuno Ridenio, nu’udar nain ba kafé movel fó sai katak, negósiu kafé movel, movel dezde iha Dezembru tinan kotuk (2016). Partisipa ona kompetisaun ne’ebé halo hosi Institutu Apoiu ba Dezenvolvimentu Emprezariál (IADE) dala-lima ona hodi hatudu inovasaun, ikus mehi sai realidade iha tinan ida ne’e.

“Entaun ha’u koko hodi tuir eventu ne’e ho serbisu ne’ebé kapa ‘as no tempu ne’ebé naruk, ha’u hatene katak presiza tebes ajuda husi IADE, no juri sira bele hili ha’u sai primeiru lugar,” Nuno informa iha Timor Plaza, horisehik.

“Antes ne’e atividade kafé movel hala’o de’it iha eventu ruma hanesan festival kafé Timór, festivál kulturál Timór, festivál ai-funan Maubisi no bazaar kalan ka night market maibé ho prémiu ne’ebé hetan ona ne’e ha’u sei hala’o atividade negósiu loroloron.”

Planu negósiu ba oin mak; sei hala’o iha Dili laran, hanesan iha jardín sira ne’e, kampus, edifísiu sira ho objetivu ida atu fasilita de’it konsumidór sira iha fatin ne’ebé mensiona.

“Sira hakarak hemu kafé no tanba ami-nia konseitu movel entaun loron ida ami bá para iha fatin rua ka tolu.”

Negósiu ida ne’e maske movel maibé konsistente ho nia produtu rasik. Kafé ne’ebé  oferese hosi kafé movel mak kafé orijinál Timór nia.

Ho rezultadu ne’e kafé movel nu’udar manan nain ba kompetisaun Planu Negósiu Inovativu hetan, Nuno Ridenio  konsidera oportunidade extraordinary  ne’ebé instituisaun relevante sira kria ona ba joven sira ne’ebé iha interese ba negósiu.

Nune’e mós bele konsidera hanesan motivasaun ba timoroan seluk atubele hamriik hodi halo vida negósiu nune’e ajuda hasa’e kreximentu iha moris ekonomia familiar nian.

Iha fatin hanesan, Diretór Ezekutivu IADE, Hernâni Vitebro da Costa Soares konta tuir katak, entre kompetidór na’in-10 ne’e tolu mak mellor liu no hetan kapitál  inisiál husi IADE ho montante U$15.000 hodi hahú sira-nia negósiu.

“Ami hein katak atividade ida ne’e sei bele promove liután joven ba emprendedór atubele kontribui ba iha dezenvolvimentu ekonomia povu no rai ida ne’e.”

Entretantu vensedór KPNI daruak mak Jacinta Ximenes ho nia planu no ideia inovativu agro-negósiu kuda ai-lia fresku. Terseiru lugar mak Regina Eki Cardoso ho negósiu tahu no tempe orgániku.

Atividade ida ne’e realiza tanba hetan tulun husi patrosinadór sira hanesan Timor Telecom, Telkomsel, Eto Telco, Eto+, ConocoPhilips, Pertamina International Timor, no Timor Plaza ne’ebé apoiu orsamentu porsentu 72 no IADE rasik iha orsamentu porsentu 38.

Ho apoiu hirak ne’e ikus mai manan nain hosi kompetisaun KPNI kada manan nain ida direitu ba osan ho montante U$5000.

(Jornalista : Maria Auxiliadora)

(Editór : Manuel Pinto)

HUSIK IDA HATÁN