José Piedade Nomeiadu Embaixadór Foun Filipina

0
307
Embaixadór José Gaspar dos Reis Correia Piedade kaer liman ho Xefe Estadu Lú Olo, hafoin simu tomada pose nu´udar embaixadór foun ba Filipina. Imajen Mídia Palásiu PR.

DILI, (TATOLI) – Prezidente Repúblika, Francisco Guterres Lú Olo nomeia Eis Diretór Jerál Ministériu Obras Públikas, Transporte no Komunikasaun, José Gaspar dos Reis Correia Piedade ba Embaixadór Extraordináriu no Plenipotensiáriu ba Repúblika Filipina.

Nomeisaun ne’e hala’o iha Palásiu Prezidente Repúblika, Bairru Pité Dili, sesta ne’e, hafoin Prezidénsia Repúblika simu proposta nomeiasaun hosi Governu.

Embaixadór foun ba Filipina hasai foto hamutuk ho Ministru Negósiu Estranjeiru no Kooperasaun, Xefe Kaza Militár Palásiu PR no família sira hafoin seremónia tomada pose. Imajen Mídia Palásiu PR.

Embaixadór José Piedade hateten orgullu reprezenta Estadu no Governu Timor-Leste ba Repúblika Filipina.

Nia hatete, fiar ne’e hakarak ka lakohi tenke asume ho responsabilidade hodi hala’o área kooperasaun ne’ebé boot liu iha nível edukasaun tanba oras ne’e timoroan barak ne’ebé Estadu haruka estuda iha Filipina la’ós ba área edukasaun de’it maibé mós área formasaun profisionál.

Biban ne’e, Ministru Negósiu Estranjeiru no Kooperasaun, Aurélio Cristóvão Guterres hein katak embaixadór foun bele reprezenta interese Timor-Leste nian iha Filipina nomós hametin liu-tan relasaun diplomátiku entre rai rua.

“Ho Filipina ita bele dehan katak ita nia kooperasaun iha área edukasaun, formasaun no selu-seluk tan. Ne’e duni ita kontinua reforsa polítika sira ne’ebé maka durante ne’e Timor-Leste estabelese ho Filipina”, dehan ba jornalista sira hafoin seremónia tomada pose iha Palásiu Prezidente Nicolau Lobato.

Nia esplika Timor-Leste estabelese ona ninia embaixada iha ASEAN tomak.

Antes ne’e, kargu Embaixadór Filipina asume hosi Juvencio Martins.

Jornalista: Xisto Freitas

Editora: Rita Almeida

HUSIK IDA HATÁN