IADE Fasilita Módulu KIN ba Jestór Sentru Juventude

0
36
Joven sira husi munisípiu 12 inklui RAEOA ne’ebé partisipa iha formasaun módulu KIN husi IADE.

DILI, (TATOLI) – Institutu Apoiu Dezenvolvimentu Emprezariál (IADE) ba dahuluk implementa ona programa formasaun ba jestór sentru juventude husi munisípiu 12 inklui Rejiaun Autónomu Espesiál Oekusi-Ambeno ho modulu “Komesa Ita-Nai Negósiu” (KIN) atu fasilita joven sira halo planu negósiu ida ne’ebé di’ak.

Formandu IADE, Boubito Lemos informa programa ida ne’e husi Sentru Juverntude Bekora, Dili ne’ebé mak identifika joven sira husi munisípiu 12 inklui RAEOA ne’ebé iha nia planu no ideia atu halo negósiu rasik.

“Balun hahú ona, balun foin mak atu hahú, bainhira sira atu komesa sira-nia planu hirak ne’e presiza jestaun. Jestaun ne’ebé di’ak mak presiza hatene planu negósiu nian. Sé ita-nia planu negósiu ladi’ak sira bele kria negósiu ida iha futuru sei labale la’o ho di’ak tanba jestaun ladi’ak”, informa Boubito iha Sede Suku Bekora, ohin.

Boubito hatutan joven sira ne’e iha ona planu no liuhusi formasaun kompleta liután planu negósiu hodi haforsa sira-nia atividade iha kada sentru juventude munisípiu nian.

“Ba sentru juventuide ne’ebé mak foin startup, sira mai kompleta sira-nian programa liuhusi planu negósiu ida ne’e para iha futuru sira-nia jestaun iha sentru nia laran di’ak, bele lori sentru juventude ida ne’e la’o di’ak iha munisípiu nia laran inklui iha nasaun Timor-Leste”.

Sentru juventude munisípiu ne’e hetan apoiu másimu husi Governu, liuliu Ministériu Edukasaun no Sekretáriu Estadu Juventude no Desportu iha Sestu Governu Konstitusionál nian liuliu iha área agrikultura no pekuária.

Formasaun ne’e realiza tanba kooperasaun ne’ebé estabelese ho IADE ho sentru juventude oinsá atu kapasita sentru joven sira iha munisípiu hodi mai aprende saida mak planu negósiu.

Bainhira joven sira ne’e hetan tiha formasaun, IADE sei halo monitorizasaun ba sentru juventude sira iha futuru para sira bele hetan dalan ruma bainhira atu aprezenta planu negósiu ne’e ba iha Banku ruma, Ajénsia Internasionál, Institutu relevante tuir planu sentru juventude nian.

“Depois ida ne’e, sira realiza ona sira-nia planu tuir ona formasaun planu negósiu, sira fila bá sira-nia munisípiu hodi implementa buat ne’ebé hetan no ikus mai IADE iha mós baze dadus nasionál hodi fulan neen tuirmai, ami bá monitoriza, sira implementa duni buat ne’ebé hetan husi IADE ka la’e? Sé laimplementa tanba saida, sé implementa nia progresu to’o iha ne’ebé?”.

Maske foin ba dahuluk tuir treinamentu husi IADE liuliu iha planu negósiu maibé juventude hamutuk 34 ne’e  organizadu no potensiál ne’ebé iha kapasidade organizasaun no iha poténsia tebes atu serbí iha sira-nia munisípiu tanba aprende iha tempu naruk iha SEJD.

Jornalista: Maria Auxiliadora

Editora: Rita Almeida

HUSIK IDA HATÁN