Hong Long Iha Lisensa Kompañia Rua

0
221
Ministru Estadu no Ministru Agrikultura no Peska (MAP), Estanislau Aleixo da Silva prezensa iha PN hodi halo audiénsia públika ho komisaun C no D. Foto/Egas Cristovão.

DILI (TATOLI)—Ministru Estadu no Ministru Agrikultura no Peska (MAP), Estanislau Aleixo da Silva husu ba kompañia Hong Long atu esplika ba ministériu tanbasá kompañia rejistu iha nasaun rua, Timor-Leste ho Indonézia.

“lei la permite no kompañia labele lori bandeira rua maibé tenke ida de’it,” Estanislau esplika ba Jornalista sira hafoin halo audensia ho deputadu sira, ohin.

Prosesu suspensaun ne’ebé mak nu’udar ministru, Estanislau halo ba kompañia Hong Long hodi la kontinua sira nia atividade peska iha Costa súl, tanba liuhosi Ministériu Negósiu Estranjeiru, Ministériu Agrikultura e Peska simu karta ida hosi Ministériu Peska Indonézia nian katak, Hong Long iha rejistu ida iha Indonézia.

“Ha’u foin simu kópia karta husi Ministra Indonézia iha dia 21 Setembru no 22 simu karta formál, iha 22 kedan ha’u hola desizaun para suspende sira-nia atividade,” Estanislau hasara tan.

Hong Long tuir karta hosi Indonézia iha Ró balun rejistu iha Indonézia, ho ida ne’e tuir lei bandu, tanba ne’e ministériu hakarak husu justifikasaun ba kompañia. Tebes ka lae sira iha bandeira rua, sé tebes duni ró sira ne’ebé iha bandeira rua, ne’e kanseladu hotu kedan. Depois tuir lei rai ne’e sei hetan tan sansaun ruma.

Hatán ba informasaun sira kona-bá sósiu kompañia timoroan ho Hong Long, Estanislau dehan, kompañia hatama timoroan balun maibé nu’udar governante ida ne’e la’ós nia kompeténsia.

“Ha’u rona ida mak señór Basílio Teixeira nian oan mane, nia naran iha ne’ebá mas ne’e nia serbisu ba kompañia. Ha’u atu hatete Timór labele serbisu ho kompañia? Ne’e saida mak ne’e. Ne’e la’ós problema ami-nian, ministériu fó de’it lisensa ba kompañia ne’ebé hatama, nia atu halo joint venture ho sé ne’e setór privadu nia atividade,” Estanislau esplika.

(Jornalista : Maria Auxiliadora)

(Editór : Manuel Pinto)

HUSIK IDA HATÁN