Hakmatek ! Lae Ba Kualkér Aktu Violénsia

0
131
Foto Espesial

DILI (TATOLI)–Juventude Aliansa Maioria Parlamentár-AMP husu ba juventude Timor-Lorosa’e atu tane as valor unidade nasionál hodi dehan, lae ba kualkér aktu violénsia, maibé hakmatek iha fatin hodi akompaña polítika ne’ebé oras la’o iha rai Timor.

Porta Vóz, Juventude AMP Agio Ferreira, dehan, atu dezenvolvimentu iha nasaun ne’e la’o tenke asegura pás no estabilidade hodi nune’e povu moris ho hakmatek.

“Ami apela ba instituisaun seguransa atu kumpre leál de’it ba Konstituisaun RDTL hodi firme kontinua asegura seguransa, pás no estabilidade hodi povu moris hakmatek,” Agio Ferreira realsa liuhosi komunikadu imprensa ne’ebé TATOLI asesu, ohin.

Fó hanoin tan ba juventude sira atu vijilante labele monu ba provokasaun sira ne’ebé ema halo maibé mantein nafatin seguransa iha fatin ne’ebé de’it, buka koopera no servisu hamutuk ho instituisaun seguransa no defeza FALINTIL-FDTL no PNTL atu kontinua mantein orden públiku, hodi asegura pás no estabilidade.

Husu mós ba Prezidente da Repúblika, atu tetu ho serenidade situasaun polítika, nune’e bainhira hola desizaun ruma tenke justu no tuir regra konstituisaun.

“Ami la konkorda kuandu programa  governu la aprova iha PN mak prezidente sei dekreta eleisaun antesipada tanba eleisaun antesipada sei la serve interese povu no nasaun.”

“Atu forma governu ne’e metin eh estavel, presiza servisu hamutuk entre partidu polítiku sira iha asentu parlamentár nune’e bele hamosu aliansa maioria parlamentár ne’ebé garante estabilidade governativa.”

Tuir juventude-AMP, servisu hamutuk rekere esforsu no sakrifísiu boot hosi partidu polítiku sira hodi , liu-liu oinsá integra programa ida-idak nian hodi bele hamosu planu jerál ida ne’ebé sei sustenta dezenvolvimentu povu no rai ne’e nian.

Organizasaun massa juventude-AMP kompostu hosi juventude Partidu Libertasaun Populár (PLP), Kmanek Haburas  Unidade Nasionál Timoroan (KHUNTO) no Congresso Nacional de Reconstrução Timor-Leste (CNRT).

Entertantu Programa VII Governu Konstitusional konsidera foin-sa’e sira mós sai prioridade ida iha dezenvolvimentu sósiu-ekonómiku rain nian, no nune’e, ho parseria hamutuk Konsellu Nasionál ba Dezenvolvimentu Juventude, Governu ne’e atu kria medida hirak ne’ebé bele duni promove koordenasaun entre entidade públika no privada oioin, ne’ebé garante promosaun husi asaun edukativa téknika-profisionál makbele dezenvolve inisiativa atu hetan asesu ba merkadu servisu nian iha área ortikultura, pekuária, akikultura, mekánika, elektromekánika, karpintaria, no atividade servisu sira seluk, hodi bele promove autonomia pesoál no profisionál ba foin-sa’e sira no kondisaun sira ne’ebé permite harii projetu ba moris ho integrasaun sosiál no profisionál.

(Jornalista : Zezito Silva).

(Editór : Manuel Pinto)

HUSIK IDA HATÁN