Hakiak Animal Hadi’a Ekonomia Familiar

0
133
Taur Matan Ruak hala’o atividade hakiak fahi hahú hosi tinan 2011 to’o ohin loron.

DILI (TATOLI)—Eis Prezidente Repúblika Taur Matan Ruak enkoraja timoroan hotu hodi hakiak animal maski servisu hanesan atan maibé aumenta rendimentu ba família.

“Ha’u iha ne’e bele hakiak fahi maibé kuandu sai, ema la dehan Prezidente Partidu Libertasaun Populár (PLP) hakiak fahi mak mai ona, ha’u atu han ai fariña eh fehuk mós ema lahatene tanba ne’e mak labele moe no baruk hodi servisu,” Taur Matan Ruak haktuir ba Jornalista sira iha nia hela fatin, Metiaut, ohin.

Taur Matan Ruak hala’o atividade hakiak fahi hahú hosi tinan 2011 to’o ohin loron, no daudaun ne’e fahi ne’ebé nia hakiak hamutuk 30 resin mak iha luhan, kompostu hosi fahi boot, natoon no ki’ik.

“Normalmente iha dadersán no loro kraik ha’u kontrola fahi. Hakiak fahi ne’e ha’u nia hoby inklui kuda modo, tenke okupa tempu livre hodi halo buat ruma,” Taur dehan tuir.

Hodi konsidera asaun ne’ebé nia halo hanesan ezemplu ki’ik oan ida ba timoroan sira atu banati tuir enkuantu iha tempu livre ne’ebé bele fó fatin hodi halo buat ruma ne’ebé fó valor ba ita nia moris.

“Uluk ami iha ai-laran iha liafuan ida dehan, servisu hanesan atan no han hanesan liurai no servisu hanesan liurai no han hanesan atan. Signifika, O baruk servisu, o nia bikan mós sei hanesan ne’e, maibé o badinas halo buat barak o nia bikan laran sei hanesan saida mak ita boot halo.”

Durante hakiak fahi, Taur Matan Ruak fa’an ona fahi tolu kada fahi ida nia fa’an ho folin U$ 2.000 no agora daudaun iha fahi neen mak bele ona atu fa’an tan.

(Jornalista : Zezito Silva)

(Editór : Manuel Pinto).

HUSIK IDA HATÁN