Governu Prepara Atu Aprezenta Fila-Fali Programa Ba PN

0
995
Reuniaun Konsellu Ministru sira-nian. Foto GPM

DILI (TATOLI)—Sétimu governu konstitusionál sei reestrutura nia programa ne’ebé rejeita hosi Parlamentu nasionál (PN), foin lalais ne’e, hodi submete tan dala ida ba PN atu halo apresiasaun. Submisaun ba daruak bazeia ba konstituisaun.

Tuir komunikadu ofisial ne’ebé TATOLI asesu iha portal http://timorleste.gov.tl/?p=18948&lang=tp haktuir katak, governu Konstitusionál VII sei reestrutura hela Programa atu aprezenta ba Parlamentu Nasionál, liuhusi sujestaun deputadu sira nian, hafoin opozisaun sira hato’o rejeisaun, kona-ba Programa ne’ebé aprezenta tiha iha loron 16 fulan-Outubru.

Primeiru-Ministru, Mari Alkatiri, garante katak, ho forma ne’e nia sei halo buat hotu atu foti Nasaun ba iha situasaun dezenvolvimentu nian ne’ebé lider istóriku sira promete tiha ona iha tempu susar luta nian.

Ho Programa foun ne’e, ne’ebé sei aprezenta dala ida de’it ho Orsamentu Retefikativu to’o iha tinan ne’e nia rohan, dala ida tan, Governu garante katak, sei halo buat hotu-hotu atu fó ba Povu futuru ida ne’ebé dignu liu, “Timor-Leste ne’ebé mak inkluzivu, justu no prósperu liután.”

Maski haree tiha situasaun ne’ebé hatudu iha Parlamentu, populasaun hatudu ninia maturidade, hodi mantein nafatin iha hakmatek no pas, Governu kaer metin ba ninia kompromisu hodi jere Ezekutivu tuir Konstituisaun Repúblika nian.

Aprovasaun ba mosaun rejeisaun nian ba Programa, husi bankada tolu opozisaun nian iha Parlamentu Nasionál, maka sai hanesan momentu kreximentu nian ida tan iha nasaun joven ne’e, ne’ebé maka haka’as an atu respeita ba valór fundamentál sira demokrasia no pluralizmu nian ne’ebé maka Governu simu ho laran moos. Pozisaun ida ne’e folin boot tebes ba Timor-Leste iha rekoñesementu internasionál no, ida ne’ebé maka depende ba Governu, sei mantein nafatin.

Antes ne’e, iha Parlamentu nasionál atu halo votasaun ba mosaun rejeisaun ne’ebé aprezenta hosi partidu Opozisaun sira (CNRT-PLP-KHUNTO) Primeiru Ministru Mari Alkatiri promete katak, hahú semana ida ne’e nia sei tun ba povu lori dokumentu programa governu hodi ba informa ba povu, hahú hosi Oekusi to’o Lautein.

“Lalika laran taridu, ha’u kontente tebes. Ohin ha’u fila kaman tebes. Kaman atu tun ba baze lori dokumentu hanesan halo referendum ba timor leste tomak, la iha ema ida bele bandu ha’u. ha’u lider partidáriu ha’u iha obrigasaun atu esplika ba povu saida mak akontese iha parlamentu ida ne’e,” Primeiru Ministru afirma.

Mari Alkatiri mós dehan, hahú ohin nia sei rai transporte hanesan karreta Primeiru Ministru nian no eskolta ne’ebé durante ne’e fó seguransa ba nia, maibé la signifika nia rezigna aan.

Mari Alkatiri sei ezerse funsaun nu’udar Primeiru Ministru tuir konstituisaun too fulan Janeiru nu’udar Primeiru Ministru governu jestaun.

“Ha’u sei la fila mai PN ne’e lori programa governu. Saida mak akontese daudaun viciado, tuir dalan los muito bem,” Primeiru Ministru Alkatiri konklui.

(Ekipa Redasaun)

HUSIK IDA HATÁN