Governu Husu Komunidade Lautein Labele Preokupa ba Folin Foos

0
613
Foto/Google.

DILI, (TATOLI) – Governu liu-hosi Diretór Nasionál Regulasaun Komersial, Ministériu Komérsiu Indústria (MKI), Domingos da Costa Soares apela ba komunidade husi munisípiu hotu, liuliu Lautein atu labele pániku tanba Governu iha kapasidade atu rezolve kestaun ne’e.

Domingos hatete munisípiu seluk seidauk iha informasaun kona-ba folin foos, signifika sei normál hela nomós iha Autoridade Munisipál Dili komunidade seidauk dehan no laiha impaktu ba problema ida ne’e.

“Husi munisípiu Lautein iha ona informasaun katak foos kilógrama 20 sa’e to’o ona iha dólar 14  to’o 18 no kilógrama 30 ne’e sa’e husi dólar 18 to’o 20, ida ne’e ita bele dehan situasaun husi munisípiu ne’e, ita tenke urjentemente oinsá mak haree ba kestaun ida ne’e”, informa Domingos iha Bebora-Dili, ohin.

Nune’e diresaun sei halo pedidu intervensaun ba Sentru Lojístiku Nasionál (CLN-sigla iha portugés) hodi fó atensaun maka’as para bele responde ho lalais tanba foos ho folin ida hanesan ne’e, komunidade sira sente preokupadu.

“Ami sei fó pedidu ba iha ne’ebá (CLN), sira sei fó atensaun iha tempu badak hodi koloka ba fatin sira ne’e”.

Diretór ne’e relata observasaun ne’ebé halo kona-ba foos iha fulan kotuk foos ho kilógrama 20 ho presu dólar 12.25 no balun U$13 ne’e normál no kilógrama 30 ne’e dólar 15 to’o U$16.

“Mas agora daudaun ita bele dehan iha munisípiu Lautein sa’e ida demais tanba ne’e tenke atensaun. Iha Dili ita-nia stock nasionál CLN nian sei maka’as bele halo intervensaun iha tinan tomak. Husi setór privadu mós stock sei maka’as”.

Tanba ne’e apela ba komunidade husi munisípiu hotu katak foos Governu nian sei iha, bele halo intervensaun ba tinan tomak hodi responde nesesidade. “Komunidade sira labele pániku ba kestaun ida ne’e, Governu iha kapasidade para rezolve kestaun ne’e”.

Sobre folin foos sa’e, Domingos hatutan seidauk identifika problema ruma molok hasa’e folin ne’e no bele dehan sa’e derrepente tanba laiha justifikasaun ida ne’ebé klaru.

“Ami sei halo kooperasaun ho munisipál sira para koloka kolega sira ne’ebé mak serbisu iha ne’ebá, sira sei buka informasaun ne’ebé detallu no ami nasionál mós buka tanba buat hanesan ne’e ita tenke rekolla informasaun ida di’ak”.

Diretór ne’e subliña, ba  operadór ekonómikau sira ne’ebé agora halo espekulasaun merkadoria ida demaziadu bainhira laiha justifikasaun, iha lei númeru 4/2011 sobre brankeamentu espekulasaun hodi foti medida tuir lei hatete.

Jornalista: Maria Auxiliadora

Editora: Rita Almeida

HUSIK IDA HATÁN