Governu Hahú Halo Ajustamentu ba Programa

0
308
Sekretáriu Estadu Konsellu Ministru no Komunikasaun Sosiál, Matias Boavida. Foto dokumentasaun Tatoli

DILI, (TATOLI) – Sekretáriu Estadu Konsellu Ministru no Komunikasaun Sosiál, Matias Boavida, informa Governu hahú halo ajustamentu ba Programa Governu Konstituisonál Dahituk nian no ko’alia kona-ba lei orgánika nomós oinsá prepara Orsamentu Retifikativu (OR).

Matias hatete kona-ba lei orgánika ne’e atu ministru ida-idak bele iha nia kompeténsia rasik.

“Porque ida ne’e ezizénsia husi deputadu sira durante debate programa Sétimu Governu Konstitusionál, hein katak bele finaliza lalais no iha loron ruma nia laran, Prezidente Repúblika bele promulga, ikus mai ita bele distribui ba públiku tomak kona-ba dekretu Sétimu Governu nian”, Matias hatete iha Palásiu Governu hafoin reuniaun KM, ohin.

Porta vós Governu ne’e hatete buat barak ne’ebé Governu ne’e tenke ajusta, dívida ne’ebé mak sai responsabilidade Governu nian no sei lori ba Paramentu Nasionál atubele deside.

Kona-ba kalendáriu atu halo aprezentasaun Orsamentu Retifikativu nian iha PN, Matias dehan mais rápido, mais possível no sei submete ba PN ho lalais liután, enkuantu programa Governu nian iha Konstituisaun Repúblika Demokrátika Timor-Leste la klaru bainhira mak tenke submete ba PN.

“Defaktu buat ida urjente agora ne’e mak Orsamentu Retifikativu tanba deputadu sira ko’alia ema barak mak atu besik mate, maibé ita laiha ai-moruk no situasaun sira ne’e obriga bele prioritiza saida mak sai prioridade ba Governu ida ne’e ba dahuluk lai, nune’e bele solusiona kestaun ne’ebé mak populasaun Timor-Leste hasoru daudaun agora”.

Kona-ba montante OR, Governu sei iha tetu ida maibé atu fiksu bainhira dokumentu preparadu hotu ona mak fó sai nia montante.

Aleinde ne’e, Matias informa mós kona-ba viajen Primeiru-Ministru nia bá Perth, Austrália iha loron 1 novembru atu partisipa konferénsia internasionál ne’ebé ko’alia kona-ba ekonomia no peska durante loron rua hafoin mai fali Timor-Leste iha loron 6 novembru.

Jornalista: Maria Auxiliadora

Editora: Rita Almeida

HUSIK IDA HATÁN