Governu Fó Ona Apresiasaun ba Sirkulár OR

0
378
Reuniaun Konsellu Ministru. Foto/GPM

DILI, (TATOLI) – Ministériu Planu no Finansa, iha reuniaun Konsellu Ministru (KM) nian, ohin, halo aprezentasaun ba sirkulár Orsamentu Retifikativu (OR) 2017 ne’ebé hetan ona apresiasaun husi Governu Konstitusionál Dahituk.

Diretór Jerál Finansa Estadu, Ministériu Planu no Finansa, Januario da Gama, informa iha sirkurlár ne’e estipula ka determina orientasaun, prosedimentu no prosesu sira ne’ebé bele gia ministériu sira atubele prepara OR.

“Aprezenta mós kalendáriu ba preparasaun tékniku no to’o bainhira mak parte Governu bele aprezenta iha Parlamentu Nasionál. Ida ne’e, ohin ami aprezenta no hetan ona apresiasaun para depois filafali bá Ministériu Planu no Finansa hodi halo elaborasaun detallu liután, depois bele aprezenta filafali mai Konsellu Ministru ho proposta lei hamutuk ho despeza detallu, depois bele hetan desizaun finál husi Konsellu Ministru hafoin aprezenta ba Parlamentu Nasionál”, Januário hatete iha Palásiu Governu, ohin.

Kona-ba kalendáriu OR nian, Januario esplika hahú serbisu iha loron 31 outubru 2017 hodi aprezenta sirkulár ba KM no to’o loron 17 novembru, téknikamente tenke konklui ona para aprezenta fali ba KM hodi deside banhira mak aprezenta iha PN.

“Montante, Konsellu Ministru husu para Ministériu Planu no Finansa ho Sekretariadu Grande Projetu halo koordenasaun ida para haree, tetu orsamentu retifikafivu, tanba ninia efeitu ne’e mai husi despeza ba progresu fundu infraestrutura nian”.

Tanba ne’e, kalkulasaun tékniku sei tuur hamutuk ho Sekretariadu Grande Projetu no ikus tenke aprezenta nia figura finál hanesan tetu OR.

Kona-ba dívida sira ne’ebé konsidera inadiavel, katak labele muda ba tinan oin, presiza responde ho OR, mas prinsípiu husi OR ne’e atu ajusta despeza ho estrutura Sétimu Governu nian.

“Maibé atu haree mós despeza balun ne’ebé urjente, ne’ebé ita labele muda ba tinan oin tanba hanesan kompromisu Estadu tenke halo kobertura ba Orsamentu Retifikativu, ita bele ajusta ba Orsamentu Retifikativu, ita bele halo ajustamentu liuhusi ida ne’e”.

Jornalista: Maria Auxiliadora

Editora: Rita Almeida

HUSIK IDA HATÁN