GOVERNO LIU HUSI TradeInvest SEIDAUK ATRIBUI SERTIFIKADU INVESTIDOR BA KOMPAÑIA HONG LONG FISHERIES, Lda

0
47
Diretór Ezekutivu TradeInvest, Arcanjo da Silva. Foto Espesiál.

TradeInvest Timor-Leste presiza klarifika ba públiku katak kompañia Hong Long Fisheries, Lda ne’ebe hala’o atividades peska industrial komersial iha tasi Timor-Leste ne’ebe agora dadaun iha hela investigasaun nia laran seidauk hetan Sertifikadu Investidor husi Governo Timor-Leste.

Maibe kompañia refere bele hala’o atividades peska iha tasi Timor-Leste tamba:

Primeiro: Kompañia Hong Long Fisheries, Lda legalmente rejista ona iha SERVE (Serviços de Registo e Verificação Empresarial) no hetan ona dokumentus legal principal 3 tuir mai ne’e, nune’e bele hala’o ninia atividades emprezarial iha Timor-Leste:

  1. Certificado de Registo Comercial ho data de emissão 15/02/2016 2. Autorização para Exercício de Atividade ho data emissão 29/02/2016 3. Certidão de Dívidas ho naran Kontribuinte Hong Long Fisheries, Lda ho TIN no. 1242443 ho data de emissão 17/03/2016, husi Ministério das Finanças.

Segundu: Kompañia Hong Long Fisheries, Lda hetan ona Lisença Pesca Comercial (Commercial Fishing Licence) no Pesca Industrial (Industrial Fishing) husi Governo TimorLeste liu husi Ministério da Agricultura e Pescas ba ro-ahi 15 ho data validade 15 de Novembro de 2016 to’o 15 de Novembro de 2017.

Nune’e kompañia Hong Long Fisheries, Lda legalmente bele hala’o ninia atividade peska industrial no komersial iha Timor-Leste. Tamba kualker kompañia ka entidade komersial tantu estranjeiru ka nasional la presiza no laos obrigatoriamente hetan Sertifikadu Investidor MOLOK atu hala’o ninia atividades komersial.

Maibe karik sira presiza Sertifikadu Investidor tamba sira hakarak hetan benefisius no insentivus fiskais no aduaneirus ne’ebe estipula iha Lei Investimento Privado No. 14/2011, 28 de Setembro, nune’e mos tenki submete aplikasaun ba Governo liu husi TradeInvest TimorLeste hodi prosesa tuir Decreto Lei No. 6/2005, 27 de Julho, konaba Regulamento de Procedimentos do Investimento Externo ne’ebe sei vigora to’o ohin loron.

OINSA BELE HETAN SERTIFIKADU INVESTIDOR?

Haktuir DECRETO DO GOVERNO N.°6/2005 DE 27 DE JULHO konaba REGULAMENTO DE PROCEDIMENTOS DO INVESTIMENTO EXTERNO Artigo 8, refere ba Documentos de acompanhamento do pedido investimento externo katak bainhira investidor ida tantu estrangeiro ka nasional, karik elijivel no prienxe rekijitus haktuir Lei Investimentu Privadu No.14/2011 hodi bele hetan Sertifikadu Investidor maka investidor refere obrigatoriamente tenke hatama aplikasaun hamutuk ho dokumentus legais komprovativos kompletu ba TradeInvest Timor-Leste hanesan tuir mai ne’e :

Formulário aplikasaun husi TradeInvest Timor-Leste, 2. Fotocópia de passaporte válido do requerente, 3. Certidão de registo criminal do requerente ou, tratando sede unidade empresarial, do representante legal desta, 4. Referências bancárias, 5. Curriculum vitae, 6. Sertificado do Registo Comersial husi SERVE, 7. Autorizasaun para exercicio de atividades husi SERVE 8. Certidão de Dívidas husi SERVE 9. Lisensa operasional husi Ministério relevante ba seitor/area ne’ebe nia investe 10. Lisensa ambiental husi MCIA 11. Lisensa no dokumentus komprovativus nesesáriu sira seluk

Bainhira investidor aplikante ka rekerente Sertifikadu Investidor hatama ona aplikasaun ho dokumentus komprovativus kompletu tuir check list ne’ebe iha, parte Tradeinvest iha Loron 10 nia laran sei halo inspesaun ba dokumentus hirak ne’e hotu no envia fotokopias ba membru KAIPE (Komisaun Avaliasaun Investimentu Privadu no Exportasaun) hodi avalia molok atu diskuti hodi expressa sira nia OBJESAUN ou NÃO OBJESAUN iha sorumutu ofisial KAIPE ne’ebe konvoka no preside husi TradeInvest Timor-Leste.

Haktuir Dekretu Lei No. 45/2015, 30 de Dezembro, artigu 18 katak, KAIPE nu’udar orgaun tekniku TradeInvest Timor-Leste ne’ebe nia membru sira konstituída husi membrus permanentes no membrus ad-hoc”ne’ebe kompostu husi Diretores Gerais ou ekivalente husi:

  1. Direção de Impostos, Ministério das Finanças, 2. Direção Alfândegas, Ministério das Finanças, 3. Direção Nasional de Terras e Propriedades, Ministério da Justiça, 4. Serviços de Registo e Verificaçao Empresarial (SERVE), 5. Direção Comércio Externo, Ministério do Comércio Industria e Ambiente (MCIA), 6. Direção do Emprego e Formação Professional (SEFOPE), 7. Direção Imigração, Ministério Interior, 8. Direção Edificação e Habitação, Ministerio das Obras Públicas, 9. Direção Ordenamento do Território, Mnistério Administração Estatal (MAE) 10. Direção Nacional Meio Ambiente, Ministério do Comércio Industria e Ambiente

Iha sorumutu KAIPE, membru sira tantu permanente no ad-hock ida-idak hato’o sira nia apresiasaun no sujestaun verbal tekniku ba proposta projetu investimentu no exportasaun tuir membru ida-idak nia k’nar, setor ka area ne’ebe sira reprezenta hodi nune’e bele diskuti no analiza klean hamutuk hodi fasilita elaborasaun pareser tékniku pur eskritu tuir lei ka baze legal husi setor ka area ida-idak nian.

Hafoin sorumutu KAIPE remata, depois de loron 5 membru KAIPE sira ida-idak sei entrega ba TradeInvest Timor-Leste sira nia PARECER TÉCNICO POR ESCRITO ORIGINAL ASSINADO tantu favorese ou la favorese tantu iha objesaun ou laiha objesaun ba proposta investimentu atu implementa.

Bazeia ba pareser tékniku husi membru KAIPE sira hotu ne’ebe submete no aumenta tan reforsu husi pareser juridíku husi Unidade Juridíka TradeInvest Timor-Leste, maka Diretor Executivo TradeInvest hakerek relatoriu  KAIPE nian ba Ministru/Ministra tutela hodi hetan konsiderasaun no aprovasaun nune’e karik Membro Governo Tutela refere aprova ou tenki lori ba Conselho de Ministros nia apresiasaun no aprovasaun maka foin bele atribui Sertifikadu Investidor ba aplikante ka rekerente. Pelo kontratriu karik la aprova maka sei notifika deit no la atribui Sertifikadu Investidor ba aplikante ka rekerente refere.

Relatoriu KAIPE ne’ebe mensiona iha leten tenki aprova no assina rasik husi membru KAIPE sira ne’ebe partisipa iha sorumutu KAIPE molok atu submete ba Ministro/Ministra tutela. Maibe bainhira investimentu  ne’e nia valor de investimentu hanesan ou liu husi $20 Milloens ou presiza rai liu husi hetares 5 iha area turismo ou 100 hetares iha area agrikola maka aprovasaun no autorizasaun ba pedidu investimentu kompete ba Conselho dos Ministros hanesan preve iha Decreto Lei N.°6/2005 de 27 de Julho konaba REGULAMENTO DE PROCEDIMENTOS DO INVESTIMENTO EXTERNO Artigo 14.

Nune’e relasiona ho Kompañia Hong Long Fisheries Lda, ne’ebe hala’o peskas industrial no komersial ne’ebe dadaun ne’e hetan investigasaun husi partes kompetentes, TradeInvest Timor-Leste hakarak INFORMA no HAKLARU ba públiku katak iha loron 24 de Setembro de 2016 kompañia refere submete mos sira nia aplikasaun hodi rekere Sertifikadu Investidor (Sertifikadu Investidor la hanesan ho Lisensa komersial no sira seluk).

Proposta investimentu no aplikasaun ho númeru rejistu TITL (55/06/2016), ho aplikante naran Mr. Wong Swee Cheong hanesan nain ba kompañia Hong Long Fisheries, Lda, ho Enderesu Sede Rua Motael, Vera Cruz, Dili; TradeInvest prosesa ona tuir lei hanesan matadalan legal ne’ebe vigora iha Timor-Leste.

Nune’e iha loron 14 de Outubru de 2016 TradeInvest konvoka sorumutu KAIPE iha Salaun Sorumutu TradeInveste iha 3o Pizu, Edifisiu TradeInvest, Rua 25 de Abril No. 8, Colmera, Vera Cruz, Dili ne’ebe partisipa husi membru KAIPE sira tantu permanente no ad-hock husi orgaun governu relevantes no kompetentes hanesan tuir mai ne’e:

  1. Gabinete Ministru Tutela ba TradeInvest, Ministro Estado Coordenador Assuntos Econímcos (MECAE) 2. TradeInvest Timor-Leste rasik ne’ebe Preside sorumutu KAIPE Refere 3. Direção Nacional de Ambiente e Controlo Poluição (MCIA) 4. Direção da Organização Urbana (MAE) 5. Direção Nacional de Cobransa Domestica/Imposto (Ministério das Finanças) 6. Direção Geral das Pescas (MAP) 7. Direção Geral do SEFOPE 8. Direção Geral de Transportes Komunikação 9. Direção Imigração, Ministério do Interior 10. APORTIL 11. Diresaun Geral das Peskas (MAP)

Haktuir lei hirak ne’ebe mensiona iha leten, membru KAIPE sira ne’ebe partisipa iha sorumutu refere submete ona sira nia pareser tékniku pur eskritu mai TradeInvest hodi anexa hamutuk ho relatoriu KAIPE no pareser Juridiku husi Unidade Juridíca TradeInvest nune’e submete ona ba Sua Exa. Sr. Ministro de Estado Coordenador dos Assuntos Económicos hanesan Membro Governo Tutela iha loron 13 de Janeiro de 2017 ho No. Ref.05/GDE/TITL/I/2017.

Tamba tuir proposta investimentu Hong Long Fisheries, Lda ne’ebe sei investe ho total kapital to’o USD $110 milloens fazeadamente, faze dahuluk sei investe USD $20 milloens, faze daruak sei investe USD $45 milloens no  faze datoluk sei investe USD $45 milloens. Maka haktuir Decreto Lei No. 6/2005 no Lei Investimento Privado No. 14/2011, Sr. Ministro Estado Coordenador dos Assuntos Económicos iha ninia kompetensia no responsabilidade atu lori ba aprezenta iha Conselho de Ministros hodi apresia, diskuti, aprova ou la aprova. Ida ne’e hakat ida ne’ebe to’o ona iha kompetensia Conselho de Ministros hodi toma desizaun a’as liu no koletiva husi Governo Timor-Leste nian.

Nune’e to’o ohin loron 28 de Setembro de 2017, Proposta Investimentu husi Hong Long Fisheries, Lda seidauk aprezenta ba Conselho de Ministros Governo Timor-Leste, tamba ne’e TradeInvest Timor-Leste TO’O OHIN LORON SEIDAUK ATRIBUI SERTIFIKADU INVESTIDOR BA KOMPAÑIA HONG LONG FISHERIES, Lda.

Karik ema ruma hakarak ka presiza klarifikasaun sobre oinsa atu hetan Sertifikadu Investidor ka hakarak konfirma issue-issue balun relativamente ba Sertifikadu Investidor ruma ka atu fo hanoin murak ruma atu tulun hodi hadia prestasaun servisu ka atendimentu husi TradeInvest Timor-Leste ba Investidores no Exportadores tantu estrangeiros ka nasionais, halo favor hakat mai TradeInvest Timor-Leste.

Ami la haluha husu deskulpa karik artigu informativu simples ida ne’e la klaru, obrigadu wai’n ba leitores sira nia atensaun.

Arcanjo da Silva

Diretor Executivo

Email: arkanjod@yahoo.com

Mobile: +670 77337789

HUSIK IDA HATÁN