Gallon H20 Livre Hosi Baktéria

0
76
Diretór DPORAL, Ângelo Edmundo Belo. Foto/Egas Cristovão.

DILI (TATOLI)- Rezultadu análize ba bee iha Laboratóriu Nasionál, Ministériu Saúde hatudu katak bee gallon ho marka H2O nia fízika, kímika no mikro biolójiku la kontaminadu no di’ak atu konsumu alias livre hosi baktéria.

Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA) submete amostra bee ho marka H20 ne’e ba laboratóriu hodi halo teste tanba hetan keixa husi konsumidór sira katak bee ne’e ular ka kontaminadu.

Tuir Diretór Departamentu Planeamentu Operasionál Risku Alimentár no Laboratóriu, AIFAESA, Ângelo Edmundo Belo hatete ho keixa ne’e husi parte AIFAESA foti kedan medida hodi tun bá fatin produsaun bee nian iha Maleuana no foti amostra bee depois entrega ba laboratóriu hodi halo analiza.

“Rezultadu ne’ebé iha hatudu katak produtu ne’e lá kontaminadu ho substánsia perigoza, fizikamente, kímika no mikrobiolojia, buat hotu lá kontaminadu signifika livre husi kontaminasaun no di’ak atu konsumu,” Ângelo informa iha Matadouru, ohin.

 “Tuir ami-nia analiza katak dala ruma produtu ne’ebé ita foti mai, ita-nia konservasaun mak  ladún di’ak tuir kondisaun ne’ebé iha. Bee Gallon ne’ebé ita lori mai tenke tau tuir nia fatin ne’ebé iha, kuandu ita loke de’it, husik kleur, tanba mikróbiu ne’e bele moris iha fatin ne’ebé de’it, kualkér tempu depois nia bele halo nia dezenvolvimentu lalais liu.”

Tanba ne’e husu ba komunidade sira bainhira konsumu produtu ida ne’ebé fasil atu dodok ou kontaminadu tenke rai iha nia fatin para labele hetan kontaminasaun.

“Ita atu hadi’a kualidade ai-han iha ita-nia rai-laran, husi komunidade ka konsumidór en jerál ita tenke koopera ho autoridade kompetente para depois buat ruma ne’ebé ita publika, ita hakarak nia fin ne’e oinsá? Bainhira produtu ne’ebé ita ladún satisfás, hato’o ba autoridade hodi la’o tuir dalan ne’ebé iha para foti solusaun ida ne’ebé di’ak.”

Rezultadu análiza laboratóriu nian mak ba parámetru fíziku; pH, E. Kondutividade, TSS, TDS, salinidade, temperatura no turbidade. Kímiku nian, NH3N, NO3N, NO2, féru (Fe), Flourida, Magnésiu hardness (Mg), Kálsiu (hardness), Klorine, Totál Hardness, no Sulfatu no ba Mikrobiolójiku; Totál Coliform nomós E.coli hatudu rezultadu pozitivu.

Nune’e produtu bee galon husi kompañia H2O livre husi kontaminante sira, tan ne’e, produtu refere bele konsumu, distribui no komersializa.

(Jornalista : Maria Auxiliadora)

(Editór : Manuel Pinto)

HUSIK IDA HATÁN