F-FDTL Simu Despaxu Hodi Aumenta Patrollamentu

0
577
Brigadeiru Jenerál FALINTIL-Forsa Defeza Timor-Leste (F-FDTL), Filomeno Paixão. Imajen mídia Palásiu PR.

DILI, (TATOLI) – Komandu FALINTIL-Forsa Defeza Timor-Leste (F-FDTL), tersa, (10/10) simu ona despaxu husi Ministru Defeza no Seguransa atu  aumenta patrollamentu iha kapitál Dili hodi mantein pás no estabilidade.

“Ami simu ona diretiva polítika hosi Ministru Defeza para aumenta patrollamentu iha sidade Diliʺ, informa Vise Xefe Estadu Maior F-FDTL, Brigadeiru Jenerál, Filomeno Paixão hafoin relata servisu semanál instituisaun F-FDTL ba Prezidente Repúblika, Francisco Guterres Lú Olo iha Palásiu Prezidensiál Bairo-Pite Dili, ohin.

Despaxu ne’e atu fó apoiu di’ak liutan ba Polísia Nasionál Timor-Leste (PNTL) hodi halo atuasaun ba krime sira ne’ebé mosu iha kapitál.

Entretantu, postu F-FDTL ne’ebé estabelese ona iha teritóriu sei mantein hodi fó seguransa iha rai laran. “Polisia Militár halo nafatin patrollamentu, ita iha fuzileiru iha Hera, forsa espesiál ne’ebé estabelese iha Dili sira halo ona kordenasaun hodi halo patrollamentu”, hatutan.

Mesmu nune’e, nia afirma, situasaun seguransa iha teritóriu la’o hakmatek tanba hetan seguransa husi PNTL no F-FDTL nomos  kontribuisaun  hosi sidadaun rasik.

Tanba ne’e, husu joven sira atu  prevene konflitu hodi apoiu prosesu dezenvolvimentu.

Enkontru ne’e, Xefe Estadu fó nafatin apoiu ba instituisaun F-FDTL atu mantein estabilidade.

Jornalista: Agapito dos Santos

Editora: Rita Almeida

HUSIK IDA HATÁN