Embaxadór Foun Japaun Sei Aprezenta Kredensiál

0
72

DILI, (TATIOLI) – Embaxadór foun Japaun, Hiroshi Minami sei aprezenta kredensiál ba Prezidente Repúblika, Francisco Guterres Lú Olo iha loron-17 fulan-outobru -2017, tuku 10.00 iha Palásiu Prezidensiál Nicolau Lobato, Bairro Pite, Dili.

Tuir komunikadu ne’ebé Tatoli simu hosi mídia Palásiu Prezidensiál, Hiroshi Minami sei hametin  liutan kooperasaun  entre nasaun rua ne’ebé desde 2002 estabelese ona ninia embaxada iha Timor-Leste.

Hiroshi Minami. Foto espesiál

Governu Japaun nu’udar nasaun ida ne’ebé ativu tebes iha prosesu konstrusaun Estadu liuhusi nia ajénsia kooperasaun Japan International Cooperation Agency (JICA).

JICA apoiu ona prosesu dezenvolvimentu iha setor públiku hanesan infraestrutura, iha governasaun no kapasitasaun servidór públiku.

Hiroshi Minami, inisia nia karera diplomátika iha Ministériu Asuntu Esternu iha 1983 hafoin konklui nia estudu iha Fakuldade Direitu Universidade Tokyo.

Sai responsável iha nivel Koordenadór Senior, Vise-Diretor iha divizaun oioin iha Ministériu to’o tinan-2004.

Iha tinan-2005 nu’udar konselleru ba Misaun Permanente ba Organizasaun Internasionál iha Viena iha tinan- 2008, nomeadu nu’udar Embaixador ba Misaun Permanente ba Japaun iha ONU iha tinan-2014 no Enviadu Estraordinariu no Ministru Plenipotensiariu ba Misaun Permanente Japaun iha ONU iha tinan-2016. (ki)

 

 

HUSIK IDA HATÁN