Ema Millaun 815 Iha Mundu Mal Nutrisaun

0
146

DILI (TATOLI) – Relatóriu Ajénsia Internasionál hanesan UNICEF, WHO, WFP no IFAD lansa relatóriu seguransa ai-han no mal nutrisaun iha mundu ne’ebé konsidera ema millaun 815 mak afetadu mal nutrisaun. Nune’e husu atu nasaun hotu servisu hamutuk halakon tiha hahú hosi agora to’o tinan 2030.

Koordenator of UN Residence, Knut Ostby informa, iha tinan 2016 ho estimasaun katak númeru ema iha mundu ho mal nutrisaun aumenta millaun 777 ba millaun 815 maski númeru ne’e tun ona kompara ho tinan 2000 ne’ebé hamutuk ema millaun 900 mak sofre mal nutrisaun

“Loron mundiál ba kondisaun seguransa ai-han mundiál atu fó sai progresu objetivu dezenvolvimentu sustentável kona-ba seguransa alimentár no nutrisaun, hodi rekoñese katak parseria entre Timor-Leste ho Ajénsia Internasionál sira importante hodi kolabora malu atu bele liberta ba mal nutrisaun,” Knut Ostby nia intervensaun iha ámbitu lansamentu relatóriu kona-ba kondisaun seguransa ai-han no mal nutrisaun, horisehik.

Tinan 2017, Estadu Seguransa Ai-han no nutrisaun iha mundu marka hanesan inísiu ba monitorizasaun regulár kona-ba progresu hodi realiza ajenda seguransa ai-han no nutrisaun iha tinan 2030.

Hafoin tinan balun númeru kontinua tun, situasaun foin daudaun bele sai sinál katak iha tendénsia kontráriu, situasaun seguransa ai-han sai at liu iha área partikulár balun hanesan Sub-Saharan Africa, Sudeste Asia no Asia Osidentál.

Observasaun hatudu katak situasaun hanesan ne’e akontese iha área konflitu, bai-loron naruk no inundasaun.

Ema hamlaha ne’ebé tun seidauk reflete redusaun labarik ne’ebé krekas, maski númeru labarik oi tuan kontinua tun maibé iha rejiaun balun mudansa ne’e la’o neineik.

Globalmente, númeru labarik badak menus hosi porsentu 29.5 ba porsentu 22.9 entre 2005 to’o 2016, maski labarik hamutuk millaun 155 hosi tinan lima mai kraik sei kontinua sofre rasa badak.

Iha 2016, labarik tinan lima mai krekas hamutuk millaun 52 no sorin hosi númeru ne’e millaun 27.6 hela iha Asia Súl.

Nasaun ida bele mosu mal nutrisaun ho tipu oioin hanesan númeru labarik ho kondisaun mal nutrisaun  ne’ebé as, feto sira sofre anemia no adultu ne’ebé bokur liu.

Númeru ema bokur liu sa’e makas hanesan mós preokupasaun iha ne’e. númeru labarik bokur liu akontese iha rejiaun hotu. Iha 2016 labarik tinan lima mai kraik hamutuk millaun 41 mak bokur liu.

Nune’e mós, númeru konflitu ne’ebé kontinua sa’e ho kondisaun klima ne’ebé ladún di’ak, grave liu tanba afeta seguransa alimentár no sai hanesan fatór prinsipál ba kondisaun ai-han la seguru.

Konflitu sai fatór prinsipál krize alimentár, tanba ne’e bainhira konflitu kontinua la’o no kapasidade institusionál fraku sei rezulta kontinuasaun mal nutrisaun ne’ebé grave liu tan.

Atu responde ba inseguransa ai-han no mal nutrisaun iha área afetadu hosi konflitu labele trata hanesan negósiu baibain, tanba ne’e presiza aprosimasaun sensivel ba konflitu no aliña ho asaun asisténsia umanitária imediatu, dezenvolve ba tempu naruk no mantein pás.

(Jornalista : Zezito Silva).

(Editór : Manuel Pinto)

HUSIK IDA HATÁN